ပဲခူးတိုင်းဒေသကြီး၊ ရေတာရှည်မြို့နယ်၊ ကွမ်းအုံကျေးရွာနဲ့ ရွာတောင်ဘက်ရှိ သရက်အုပ်အတွင်း တပ်စွဲနေတဲ့ စစ်ကောင်စီတပ်အား ပုဝါနီစစ်ကြောင်းနဲ့ ပူးပေါင်းတပ်ဖွဲ့တွေက ဇန်နဝါရီ ၉ ရက် မနက် ၅ နာရီလောက် သွားရောက်တိုက်ခိုက်ခဲ့ရာမှ ၂ နာရီခွဲကြာ တိုက်ပွဲဖြစ်ပွားခဲ့တယ်လို့ ပုဝါနီစစ်ကြောင်း တာဝန်ရှိသူက ပြောပါတယ်။

အဆိုပါတိုက်ပွဲမှာ စစ်ကောင်စီဘက်က ၁၅ ဦး ကျဆုံးပြီး အများအပြား ထိခိုက်ဒဏ်ရာရရှိခဲ့တယ်လို့ ဆိုပါတယ်။

တိုက်ပွဲဖြစ်ပွားချိန်အတွင်း ဆွာမြို့၊ အမှတ် ၁၉ ခြေမြန်တပ်ရင်းက ၁၂၀ မမ လက်နက်ကြီး ၁၀ လုံးထက်မနည်း သဖန်းဇင်ရွာနဲ့ ကွမ်းအုံကျေးရွာကြား ပစ်ခတ်ခဲ့သလို တိုက်ပွဲပြီးဆုံးချိန်မှာလည်း တော်လှန်ရေးအင်အားစုများ ဆုတ်ခွာသွားတယ်လို့ ယူဆရတဲ့ နေရာတွေကို ရေတာရှည်မြို့၊ အောင်ချမ်းသာကျေးရွာကနေ ၈၁ မမ လက်နက်ကြီး ၁၀ လုံးထက်မနည်း  ပစ်ခတ်ခဲ့တယ်လို့ ဆိုပါတယ်။

အဆိုပါ တိုက်ပွဲကို ပုဝါနီစစ်ကြောင်း၊ ကီးကူစစ်ကြောင်း၊ နေပြည်တော် PDF၊ တပ်ရင်း ၃၅၀၁ တပ်ခွဲ ၄ တို့ ပူးပေါင်းဆောင်ရွက်ခဲ့တာဖြစ်ပြီး တော်လှန်ရေးအင်အားစုဘက်မှ အထိအခိုက်မရှိ အောင်မြင်စွာ ဆုတ်ခွာနိုင်ခဲ့တယ်လို့ ဒေသကာကွယ်ရေးပူးပေါင်းတပ်ဖွဲ့ဝင်တွေဆီက သိရပါတယ်။

တိုက်ပွဲအတွင်း စစ်ကောင်စီဘက်က သေဆုံးဒဏ်ရာရမှုအခြေအနေနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးပါဘူး။

ဇန်နဝါရီ ၁၀ ရက် မနက် ၁၀ နာရီ၊ မိနစ် ၂၀ လောက်မှာတော့ စစ်ကောင်စီက ပစ်ခတ်တဲ့ လက်နက်ကြီးကျည် ရေတာရှည်မြို့နယ် သဖန်းဇင်ကျေးရွာမှာ ကျရောက်ပေါက်ကွဲတာကြောင့် ပြည်သူ ၁ ဦးသေဆုံးပြီး ၃ ဦး ဒဏ်ရာရခဲ့တယ်လို့ ဒေသခံတွေဆီကနေ သိရပါတယ်။

ဆွာမြို့၊ အမှတ် (၁၉) ခြေမြန်တပ်ရင်းနဲ့ ရွှေကဇောင်းကျေးရွာတို့ကနေ ပစ်ခတ်တဲ့ ၁၂၀ မမ၊ ၆၀ မမ လက်နက်ကြီးတွေနဲ့ ပစ်ခတ်ခဲ့တာဖြစ်ပြီး အသက် ၆၈ နှစ်အရွယ် ဒေါ်အေးမြင့် သေဆုံးကာ အမျိုးသမီး ၃ ဦး ဒဏ်ရာရခဲ့တယ်လို့ ဒေသခံတဦးက ပြောပါတယ်။