မလေးရှားနိုင်ငံ၊ မာလကာပြည်နယ်ထဲမှာရှိတဲ့ ကမ်းနားတွေမှာ တရားမဝင်ဈေးရောင်းနေတဲ့ မြန်မာနိုင်ငံသား ၈ ဦးအပါအဝင် ၃၆ ဦးကို ဇန်နဝါရီ ၄ ရက်နေ့မှာ ဖမ်းဆီးခဲ့တယ်လို့ မာလကာလူဝင်ကြီးကြပ်ရေးဌာနက ထုတ်ပြန်ပါတယ်။
မာလာကာပြည်နယ်ရှိကမ်းနားမှာ နိုင်ငံခြားသားတွေ အစားအသောက်ရောင်းချနေတဲ့ ဈေးဆိုင်တွေ ဖွင့်ထားတယ်ဆိုပြီး သတင်းရတာကြောင့် မနေ့မွန်းလွဲ ၂ နာရီက မာလာကာလူဝင်ကြီးကြပ်ရေးအဖွဲ့က ရှောင်တခင်ဝင်ရောက်စစ်ဆေးခဲ့ရာ နိုင်ငံခြားသား ၇၀ ကို ဖမ်းဆီးရမိခဲ့ပါတယ်။
ဖမ်းဆီးရမိခဲ့တဲ့ နိုင်ငံခြားသား ၇၀ ထဲမှ အထောက်အထားစာရွက်စာတမ်းပါရှိတဲ့ ၃၄ ဦးကို ပြန်လွှတ်ပြီး အထောက်အထားစာရွက်စာတမ်းမပါရှိတဲ့ မြန်မာနိုင်ငံသား အမျိုးသား ၇ ဦးနဲ့ အမျိုးသမီး ၁ ဦး၊ အင်ဒိုနီးရှားနိုင်ငံသား ၁၆ ဦး၊ သီရိလင်္ကာ ၅ ဦး နဲ့ ဘင်္ဂလာဒေ့ရှ်နိုင်ငံသား ၇ ဦးတို့ကို မလကာလူဝင်ကြီးကြပ်ရေးဌာနကို ခေါ်ဆောင်ခဲ့ပါတယ်။
မလေးရောက်မြန်မာနိုင်ငံသားတဦးက "မလေးလဝက တနေ့ ၂ ပြည်နယ်လောက်ကို စီမံချက်တွေနဲ့ ဝင်ဖမ်းနေတာ။ ဒီရက်တွေမှာ အပြင်မထွက်တာက အ ကောင်းဆုံးပါပဲ။ နောက်ပြီးရှောင်သင့်တာက ကိုယ်နေတဲ့နေရာမှာ ရန်ဖြစ်တာတို့ ဆူဆူညံညံလုပ်တာတွေပါ။ ဒီရက်ပိုင်း ဖမ်းဆီးခံရတဲ့ မြန်မာတွေက ၂၀၀ ကျော်နေပြီ။ နောက်ပြီး မလေးမှာ ကူညီပေးတဲ့အဖွဲ့ဆိုပြီး သီးသန့်မရှိလို့ ဂရုစိုက်သင့်ပါတယ်" လို့ ပြောပါတယ်။
ဖမ်းဆီးရမိသူတွေကို တရားဝင်အထောက်အထား စာရွက်စာတမ်းမရှိတာနဲ့ တရားမဝင် အလုပ်လုပ်ကိုင်မှုတို့အတွက် လူဝင်မှုကြီးကြပ်ဥပဒေနဲ့ အရေးယူသွားမယ်လို့ မာလာကာလူဝင်ကြီးကြပ်ရေးဌာနက ထုတ်ပြန်ထားပါတယ်။
မလေးရှားနိုင်ငံ၊ ဂျိုဟိုးပြည်နယ်ထဲမှာလည်း ဇန်နဝါရီ ၃ ရက်က တရားမဝင်နေထိုင်နေတဲ့ မြန်မာနိုင်ငံသား ၁၃ ဦးအပါအဝင် နိုင်ငံခြားသား ၂၈ ဦးကို မလေးလူဝင်ကြီးကြပ်ရေးဌာနက ဖမ်းဆီးခဲ့ပါတယ်။
