ရန်ကုန်တိုင်း၊ ဒဂုံဆိပ်ကမ်းမြို့နယ်၊ ယုဇနဥယျာဉ်မြို့တော်မှာ ဇန်နဝါရီ ၂ ရက်နေ့လယ်က စစ်ကောင်စီ တပ်ဖွဲ့ဝင်တွေက ပြည်သူ ၇ ယောက် ထက်မနည်းကို ဖမ်းဆီးသွားတယ်လို့ ဒေသခံတွေက ပြောပါတယ်။
စစ်ကောင်စီတပ်ဖွဲ့ဝင်တွေနဲ့ ပျူစောထီးအဖွဲ့တွေက အိမ်ရာဝင်းအတွင်း အိမ်စီးကားတွေနဲ့ လာရောက်ပြီး အမျိုးသား အမျိုးသမီး ၇ ဦးထက်မနည်းကို ဖမ်းဆီးသွားတာဖြစ်ပါတယ်။
ယုဇနဥယျာဉ်မြို့တော်မှာ နေထိုင်သူတစ်ဦးက “အိမ်စီးကား ၁၂ စီးလောက်နဲ့ A ဘလောက်မှာ ရပ်ပြီး ထမင်းဆိုင်က အမျိုးသားတစ်ဦးကိုအရင် ဖမ်းတယ်။ အဲဒီကနေ B ဘလောက်ဘက်ကို ကားနဲ့ပတ်ပြီး လိုက်ဖမ်းတယ်။ အရပ်ဝတ်တွေနဲ့ပဲ သေနတ်အရှည်တွေ လွယ်ထားတယ်။ ကားပေါ် တင်ဖမ်းသွားတာ တွေ့လိုက်ရတာတော့ အမျိုးသား ၅ ဦးနဲ့ အမျိုးသမီး ၂ ဦး ဖမ်းသွားတာ တွေ့လိုက်တယ်။ ဘာလို့ ဖမ်းလဲတော့ မသိဘူး”လို့ ပြောပါတယ်။
စစ်ကောင်စီတပ်ဖွဲ့ဝင်တွေနဲ့ ပျူစောထီးအဖွဲ့တွေက B ဘလောက်အရောက်မှာ သေနတ် ပစ်ဖောက်ပြီးနောက် လူငယ်အမျိုးသား အမျိုးသမီး ၅ ဦး အသက် ၅၀ ကျော် အရွယ် အမျိုးသား တစ်ဦးနဲ့ A ဘလောက်မှာနေတဲ့ အမျိုးသားတစ်ဦးတို့ကို ဖမ်းဆီးသွားခဲ့တာပါ။
ပြီးခဲ့တဲ့ ၂၀၂၃ ခုနှစ် ဇွန် ၂၃ ရက်က ယုဇနဥယျာဉ်မြို့တော် C ဘလောက်မှာ နေထိုင်တဲ့ မြို့နယ် စီမံအုပ်ချုပ်ရေး အဖွဲ့ဝင်တစ်ဦး သေနတ်နဲ့ ပစ်ခတ်ခံရပြီးနောက်ပိုင်း စစ်ကောင်စီတပ်က ဒေသခံ ပြည်သူ သုံးဦးထက်မနည်းကို ဖမ်းဆီးခဲ့ပါသေးတယ်။
