မလေးရှားနိုင်ငံ၊ ဆီလန်ဂါပြည်နယ်မှာ တရားမဝင်ငါးဖမ်းတာ၊ အထောက်အထား စာရွက်စာတမ်း မပါရှိတာနဲ့ မူးယစ်စေတဲ့အရွက်တွေ တွေ့ရှိခဲ့တဲ့အတွက် မြန်မာနိုင်ငံသား ၄ ဦးကို ဖမ်းဆီးခဲ့တယ်လို့ မလေးရှားကမ်းခြေစောင့်တပ်ဖွဲ့က ထုတ်ပြန်ပါတယ်။
ဆီလန်ဂါရေကြောင်းညွှန်ကြားရေးမှူး မိုဟာမတ်ဆာလက် ဦးဆောင်တဲ့အဖွဲ့ဟာ ဒီဇင်ဘာ ၃၁ ရက် ညနေ ၅ နာရီလောက်က ဆီလန်ဂါရေပြင်ထဲမှာ ငါဖမ်းနေတဲ့ မသင်္ကာဖွယ်ရာ ငါးဖမ်းလှေတစီး တွေ့ရှိတဲ့အတွက် စစ်ဆေးခဲ့ပါတယ်။
ငါးဖမ်းလှေပေါ်မှာ အသက် ၂၆ နှစ်မှ ၄၁ နှစ်ကြား အထောက်အထား စာရွက်စာတမ်းမပါရှိတဲ့ မြန်မာနိုင်ငံသား ၄ ဦး တွေ့ရှိခဲ့ပြီး ငါဖမ်းလှေနဲ့ပတ်သက်တဲ့ စာရွက်စာတမ်းတွေကို စစ်ဆေးရာ နိုင်ငံခြားသားလုပ်ပိုင်ခွင့်မရှိတဲ့အပြင် လှေပေါ်မှာ မူးယစ်စေတဲ့ ကီတမ်ရွက်နဲ့ အရည်တွေ တွေ့ရှိခဲ့တယ်လို့ ဆီလန်ဂါ ရေကြောင်းညွှန်ကြားရေးမှူး မိုဟာမတ်ဆာလက်က ပြောပါတယ်။
“ငါးဖမ်းလှေဟာ နိုင်ငံခြားသားလုပ်ပိုင်ခွင့် မတင်ထားသလို လှေပေါ်ပါလာတဲ့ မြန်မာနိုင်ငံသားတွေကလည်း အထောက်အထားမပါဘူး။ ငါးသိုလှောင်ခန်းထဲမှာ မူးယစ်စေတဲ့ ကီတမ်အရွက် ၁ ဒသမ ၆ ကီလိုဂရမ်နဲ့ ကီတမ်အရည် ၁၃ ဒသမ ၅ လီတာကို ဖမ်းဆီးခဲ့ပါတယ်။ ဖမ်းဆီးခဲ့တဲ့ မြန်မာနိုင်ငံသား ၄ ဦးနဲ့ သိမ်းဆည်းခဲ့တဲ့ ပစ္စည်းတွေကို မလေးရှား စုံစမ်းစစ်ဆေးရေးအရာရှိထံ အပ်နှံခဲ့ပါတယ်။”
ဖမ်းဆီးရမိခဲ့တဲ့ မြန်မာနိုင်ငံသား ၄ ဦးကို ငါးလုပ်ငန်းဦးစီးဌာန ခွင့်ပြုချက်မရှိဘဲနဲ့ ငါးဖမ်းခြင်းနဲ့ အထောက်အထား စာရွက်စာတမ်း မရှိခြင်းတို့အတွက် လူဝင်မှုကြီးကြပ်ရေး ဥပဒေနဲ့ တရားစွဲခဲ့သလို စိတ်ကြွစေတဲ့ ကီတမ်အရွက်နဲ့ အရည်တွေ တွေ့ရှိမှုအတွက် ၁၉၅၂ မူးယစ်ဆေးဝါးဥပဒေနဲ့ပါ အရေးယူဖို့ ဆောင်ရွက်နေတယ်လို့ မလေးရှား ကမ်းခြေစောင့်တပ်ဖွဲ့က ထုတ်ပြန်ပါတယ်။
ပြီးခဲ့တဲ့ ဒီဇင်ဘာ ၂၆ ရက်ကလည်း မလေးရှားနိုင်ငံ၊ ပီရက်ပြည်နယ်မှာ တရားမဝင် ငါးဖမ်းခဲ့တဲ့ မြန်မာနိုင်ငံသား ၄ ဦး အပါအဝင် ၅ ဦးကို မလေးရှား ကမ်းခြေစောင့်တပ်ဖွဲ့က ဖမ်းဆီးခဲ့ပါတယ်။
