ရန်ကုန်တိုင်း၊ လှိုင်သာယာမြို့နယ်က နေရာ ၆ နေရာမှာ ဒီဇင်ဘာ ၃၁ ရက် ည ၈ နာရီကစပြီး ဗုံးကွဲတာတွေ ဆက်တိုက်ဖြစ်ပွားခဲ့ပြီး စစ်တပ်က ရပ်ကွက်တွေအတွင်း လိုက်လံမွှေနှောက်တာတွေ ပြုလုပ်ခဲ့တယ်လို့ ဒေသခံတွေက ပြောပါတယ်။

လှိုင်သာယာမြို့ခံတဦးက “ဗုံးကွဲတာ အရမ်းအင်အားပြင်းတယ်။ တချို့အိမ်တွေဆို ငလျင်လှုပ်သလို တုန်သွားတယ်။ ဗုံးကွဲပြီး မကြာဘူး စစ်တပ်ရောက်လာပြီး ဟိုစစ် ဒီစစ်၊ ဟိုမေး ဒီမေး လုပ်သွားကြတယ်။ သေတာရှိမရှိတော့ မသိရသေးဘူး” လို့ ပြောပါတယ်။

ဗုံးခွဲတိုက်ခိုက်ခံခဲ့ရတဲ့ နေရာတွေကတော့ ၃ ရပ်ကွက် အုပ်ချုပ်ရေးမှူးရုံး၊ ၂ ရပ်ကွက် အုပ်ချုပ်ရေးမှူးရဲ့ နေအိမ်၊ ၂ ရပ်ကွက် ရာအိမ်မှူးတဦးရဲ့ နေအိမ်၊ ၁ဝ ရပ်ကွက် ရာအိမ်မှူးတဦးရဲ့ နေအိမ်၊ လူမိုက် ဝင်းနိုင်ရဲ့တပည့် ပျူစောထီးနေအိမ်တို့နဲ့ စစ်အုပ်စုတပ်စွဲရာ ရဲတပ်တို့ဖြစ်တယ်လို့ သိရပါတယ်။

အဲ့ဒီနေရာတွေကို Anonymous Fighters Force-AFF, Rangoon Urban Force-RUF, Freeland Attack Force-FLA တို့က တိုက်ခိုက်ခဲ့တာလို့ ဒီနေ့မနက်မှာ ထုတ်ပြန်ထားပါတယ်။

ဒီလို ဗုံးကွဲမှုတွေ ဖြစ်ပွားခဲ့ပေမဲ့ ပြည်သူ့ရင်ပြင်မှာ ပြုလုပ်ခဲ့တဲ့ New Year Countdown ပွဲကတော့ ထူးခြားမှုမရှိခဲ့ဘဲ ပွဲပြီးတဲ့အထိ ပြုလုပ်နိုင်ခဲ့တယ်လို့ အဆိုပါပွဲကို သွားရောက်သူတွေက ပြောပါတယ်။