မန္တလေးတိုင်း မတ္တရာမြို့နယ် ဥဒိန်ရွာကို စစ်ကောင်စီတပ်က မီးရှို့ဖျက်ဆီးခဲ့တာကြောင့် နေအိမ် ၄၉ လုံး မီးလောင်ခဲ့တယ်လို့ ဒေသခံတွေက ပြောပါတယ်။
ဒီဇင်ဘာ ၃၁ ရက် မနက်အစောပိုင်းကစပြီး မတ္တရာမြို့ထဲကနေ ထွက်လာတဲ့ အင်အား ၁၀၀ ခန့်ပါ စစ်ကြောင်းက ဥဒိန်ကျေးရွာကို မီးရှို့ခဲ့တာပါ။
“မတ္တရာမြို့ထဲကထွက်လာတဲ့ စစ်ကြောင်းပေါ့၊ ခန့်မှန်းခြေအင်အား ၁၀၀ လောက်ပါတယ်၊ ၄ နေရာခွဲပြီးရှို့သွားတာ၊ အိမ်ခြေက ၄၉ လုံးလောင်တယ်။ ရွာမြောက်ပိုင်းမှာ ၂၁ လုံး၊ ရွာတောင်ပိုင်းမှာ ၂၈ လုံးလောင်တယ်။ အဲ့ဒီရွာကအိမ်ခြေ ၁၀၀၀ နဲ့ ၁၅၀၀ ကြားရှိတယ်” လို့ Wetlet Information Network တာဝန်ခံက ပြောပါတယ်။
ဥဒိန်ကျေးရွာကို နေရာ ၄ နေရာခွဲကာ မီးရှို့ဖျက်ဆီးပြီးတဲ့နောက် ရွာထဲက အိမ်စီးကား ၁ စီးကို ခိုးယူသွားကာ ညနေပိုင်းမှာ မတ္တရာမြို့ထဲပြန်ဝင်သွားပြီလို့ သိရပါတယ်။
မီးရှို့ဖျက်ဆီးမှုကြောင့် လူနေအိမ် ၄၉ လုံး မီးလောင်ဆုံးရှုံးခဲ့ရပြီး ရွာခံပြည်သူ ၅၀၀၀ ကျော်လည်း ထွက်ပြေးတိမ်းရှောင်နေကြရပါတယ်။
မီးရှို့ဖျက်ဆီးခံရတဲ့ ဥဒိန်ကျေးရွာက ပြည်သူ ၅၀၀၀ ကျော်ဟာလည်း နီးစပ်ရာ မြစ်ကမ်းနံဘေးက သောင်ပြင်နဲ့ ကိုင်းတောတွေမှာ ထွက်ပြေးတိမ်းရှောင်နေကြရတယ်လို့ ဒေသခံတွေက ပြောပါတယ်။
