ချင်းပြည်နယ်မှာ ချင်းပြည်နဲ့ ချင်းအမျိုးသားအရေး နိုင်ငံရေး၊ စစ်ရေး ပူးပေါင်းဆောင်ရွက်ဖို့ “ချင်းညီနောင်”အဖွဲ့ကို ဖွဲ့စည်းလိုက်တယ်လို့ အဲဒီအဖွဲ့က ဒီဇင်ဘာ ၃၀ ရက်မှာ ထုတ်ပြန်ကြေညာပါတယ်။
ချင်းညီနောင်အဖွဲ့မှာ ဇိုမီးဖက်ဒရယ်အစည်းအရုံး (ZFU/ PDF-Zoland)၊ ချင်းအမျိုးသားအဖွဲ့ချုပ် (CNO/ CNDF)၊ ချင်းအမျိုးသားကောင်စီ-မင်းတပ် (CNC-Mindat/CDF-Mindat) တို့ ပါဝင်တယ်လို့ သိရပါတယ်။
“စစ်ရေး နိုင်ငံရေးမှာ ယခင်ကလို စာရွက်ပေါ်မှာစုဖွဲ့ပြီး ပူးပေါင်းတဲ့ပုံစံ မဟုတ်ဘဲနဲ့ မြေပြင်မှာ နိုင်ငံရေးမှာ ကျောချင်းကပ်ပြီးတော့ ရပ်တည်ဖို့ ရည်ရွယ်ထားတာပါ။ အထူးသဖြင့် ချင်းအမျိုးသားရေးနဲ့ နိုင်ငံပြန်လည်ထူထောင်ရေး ပူးပေါင်းဆောင်ရွက်သွားဖို့ ဖြစ်ပါတယ်” လို့ PDF Zoland ပြောရေးဆိုခွင့်ရှိသူက ပြောပါတယ်။
PDF Zoland က တီးတိန်မြို့နယ်နဲ့ တွန်းဇံမြို့နယ်၊ CNDF က ဖလမ်းမြို့နယ်နဲ့ CDF-Mindatက မင်းတပ်မြို့နယ်တို့မှာ အဓိကစစ်ရေးလှုပ်ရှားနေကြပြီး အခုစုဖွဲ့မှုဟာ ချင်းပြည်နယ်မြို့နယ် ၉ မြို့နယ်ရှိတဲ့အနက် ၄ မြို့နယ်ရဲ့ ဖွဲ့စည်းမှုကို ကိုယ်စားပြုတယ်လို့ တာဝန်ရှိသူတွေက ပြောပါတယ်။
ချင်းညီနောင် ၃ ဖွဲ့ရဲ့ ဘုံသဘောတူညီချက်နဲ့ ကိုက်ညီသော အဖွဲ့အစည်း၊ ပုဂ္ဂိုလ်တွေနဲ့ ချင်းပြည်နယ်အရေး၊ ချင်းတမျိုးသားလုံးအရေးနဲ့ ပြည်ထောင်စုအရေး ကိစ္စတွေမှာ ညှိနှိုင်းပူးပေါင်း ဆောင်ရွက်သွားမယ်လို့ သိရပါတယ်။
