မနေ့ညက ကစားခဲ့တဲ့ ဗီလာနဲ့ပွဲစဉ်မှာ အနိုင်ရခဲ့တာဟာ ဘဝရဲ့ အကောင်းဆုံးနေ့တစ်နေ့ ဖြစ်ကြောင်း မန်ယူတိုက်စစ်မှူး ဟွိုက်လန်းက ပြောသွားပါတယ်။
ဟွိုက်လန်းဟာ ဗီလာနဲ့ပွဲမှာ အနိုင်ဂိုးသွင်းပေးခဲ့ပြီး ပရီးမီးယားလိဂ် ပထမဆုံးသွင်းဂိုးလည်း ဖြစ်ခဲ့တာပါ။
အပျော်ရွှင်ဆုံး လူသားတစ်ယောက်ဖြစ်ခဲ့သလို ဘဝရဲ့ အကောင်းဆုံးနေ့တစ်နေ့လည်း ဖြစ်ခဲ့ကြောင်း ဗီလာကို အနိုင်ရတဲ့ပွဲအပြီးမှာ ဟွိုက်လန်းက ပြောပါတယ်။
မန်ယူအသင်းဟာ ခြေစွမ်းထက်မြက်နေတဲ့ ဗီလာကို ပထမပိုင်းမှာ ဦးဆောင်ဂိုးနှစ်ဂိုး ပေးခဲ့ရပေမဲ့ ဒုတိယပိုင်းမှာ သုံးဂိုးသွင်းပြီး နိုင်ပွဲပြန်လည်ရရှိခဲ့တာပါ။ အဆုံးသတ်ချိန်အထိ ယုံကြည်မှုရှိရှိနဲ့ အသင်းရဲ့ စရိုက်လက္ခဏာတွေ ပြသနိုင်ခဲ့တဲ့ပွဲ ဖြစ်ပြီး ပထမဆုံးပရီးမီးယားလိဂ်သွင်းဂိုးရရှိခဲ့တဲ့ အပေါ်မှာလည်း ဂုဏ်ယူကျေနပ်မိကြောင်း ဟွိုက်လန်းက ပြောပါတယ်။
နှစ်ဂိုးသွင်းခဲ့တဲ့ ဂါနာချိုကတော့ ဘယ်တော့မှ အရှုံးမပေးဘဲ ကြိုးစားမှုရဲ့ရလဒ်ဖြစ်ကြောင်းနဲ့ အသင်းတိုက်စစ်က ဂိုးမသွင်းနိုင်ဘူး ဆိုတဲ့ ဝေဖန်မှုတွေကို ချေဖျက်ပြနိုင်ခဲ့ကြောင်း ပွဲအပြီးမှာ ပြောသွားပါတယ်။
Photo - Reuters
