ရှမ်းပြည်နယ်တောင်ပိုင်း တောင်ကြီးမြိုမှာ လျှပ်စစ်မီးအချိန်ကြာမြင့်စွာ ပြတ်တောက်နေတာကြောင့် အစားထိုးအသုံးပြုတဲ့ မီးဖိုချောင်သုံး ဂက်စ်ဈေးနှုန်း ၂ ဆမြင့်တက်သွားပြီး ဝယ်ယူဖို့လည်း ခက်ခဲလာတယ်လို မြိုခံတွေက ပြောပါတယ်။
လျှပ်စစ်မီးပြတ်တောက်မှုကြောင့် စက်သုံးဆီဈေးနှုန်းနဲ့အတူ မီးဖိုချောင်သုံး ဂက်စ်ဈေးနှုန်း ၂ ဆထိ မြင့်တက်ခဲ့ပြီး လက်ရှိမှာ ဂက်စ်ဆိုင်တော်တော်များများ ပိတ်ထားတာကြောင့် ဂက်စ်ရဖို့ တမြို့လုံးနီးပါး ရှာဝယ်နေရတယ်လို ဒေသခံတွေက ပြောပါတယ်။
တောင်ကြီးမြို့ ဘုရားဖြူရပ်ကွက် အမျိုးသမီးတဦးက "မီးကလည်းမလာဘူး၊ ဂက်စ်တွေ သုံးတော့လည်း ဂက်စ်လည်းဝယ်လိုမရဘူး၊ အခုတော့ ထင်းတွေပါဝယ်ထားရတယ်။ မီးသွေးလည်း တအိတ်ကို ကျပ် ၃ သောင်းနီးပါးရှိနေပြီ။ ကုန်ဈေးနှုန်းတက်တာက တက်ပေါ့၊ မီးပါဖြတ်တော့ ချွေတာပြီးချက်စားလိုတော့ မရဘူး” လို့ ပြောပါတယ်။
တောင်ကြီးမြို့မှာ အိတ်ဆောင်ဂက်စ်ဘူး အသေး ၁ ဘူးကို အရင်က အရင်က ကျပ် ၇၀၀ ကနေ ကျပ် ၃၀၀၀၊ ၄ ကီလိုဂရမ်အိုး ကျပ် ၈၀၀၀ ကနေ ကျပ် ၁၆၀၀၀၊ ၇ ကီလိုဂရမ်အိုး ကျပ် ၁၂၀၀၀ ကနေ ကျပ် ၂၄၀၀၀၊ ၁၂ ကီလိုဂရမ်အိုး ကျပ် ၂၀၀၀၀ ကနေ ၄၀၀၀၀ ကျပ်အထိ ဈေးနှုန်းမြင့်တက်ခဲ့ပါတယ်။
တောင်ကြီးတန်ဆောင်တိုင်ပွဲ ကျင်းပပြီးတဲ့နောက်ပိုင်း တောင်ကြီးမြို့မှာ တရက်ကို ၅ နာရီခြား ၁ ကြိမ်သာ လျှပ်စစ်မီးရရှိကာ မနက်နဲ့ ညနေပိုင်း ထမင်းဟင်းချက်ပြုတ်ချိန်တွေမှာ မီးဖြတ်ခံထားရပါတယ်။
