ချင်းပြည်နယ်၊ မင်းတပ်မြို့မှာ 1126 အော်ပရေးရှင်းအဖြစ် မိခင်နဲ့ ကလေးရုံးမှာ လုံခြုံရေးယူထား တဲ့ စစ်ကောင်စီတပ်ကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ ဦးသေဆုံးခဲ့တယ်လို့ မင်းတပ်ကွန်မန်ဒိုတပ်ဖွဲ့က ထုတ်ပြန်ပါတယ်။
နိုဝင်ဘာ ၂၆ ရက် မနက် ၈ နာရီကျော်မှာ မိခင်နဲ့ ကလေးရုံးအပေါ်ဘက်မှာ လုံခြုံရေးယူထားတဲ့ စစ်ကောင်စီတပ်သားတွေကို တိုက်ခိုက်ခဲ့တာဖြစ်တယ်လို့ သိရပါတယ်။
အပြန်အလှန်ပစ်ခတ်မှုအတွင်း စစ်ကောင်စီတပ်သား ၃ ဦး သေဆုံးခဲ့ပြီး အပြင်းအထန်ဒဏ်ရာ ၄ ဦး ရရှိခဲ့ကာ ဆေးရုံရောက်မှ ၂ ဦးထပ်မံ သေဆုံးခဲ့တာလို့ Mindat Commando Force ဦးဆောင်သူ ဆလိုင်းအန်ထော်နီက ပြောပါတယ်။
“မင်းတပ်ကွန်မန်ဒိုတပ်ဖွဲ့က မနေ့က 1126 အော်ပရေးရှင်းဆိုပြီးမှ စတင်တိုက်ခိုက်ခဲ့တာပါ။ ကျနော်တို့ လုပ်ဆောင်နိုင်တဲ့ အခြေနေတစ်ခုထိတော့ လုပ်ဆောင်သွားမယ်၊ အကန့်အသတ်တော့ မရှိဘူး။”
တိုက်ပွဲအတွင်းမှာ စစ်ကောင်စီက ပစ်ခတ်တဲ့ လက်နက်ကြီးစထိ မှန်ပြီး မြို့ခံ ၂ ဦး ထိခိုက်ဒဏ်ရာ ရရှိခဲ့ပါတယ်။
တိုက်ပွဲပြီးတဲ့နောက်ပိုင်း စစ်ကောင်စီတပ်က မင်းတပ်မြို့ရဲ့ နေရာအနှံ့မှာ ကင်းလှည့်နေပြီး နိုဝင်ဘာ ၂၇ ရက် မနက်ပိုင်းမှာတော့ မင်းတပ်မြို့ အဝင်အထွက်ကို ယာယီပိတ်ထားတယ်လို့ ဒေသခံတွေက ပြောပါတယ်။
