ရှမ်းပြည်မြောက်ပိုင်း၊ ကျောက်မဲခရိုင်၊ သီပေါမြို့နယ်ထဲမှာ နိုဝင်ဘာ ၂၂ ရက် က စစ်ကောင်စီတပ်ဖွဲ့ဝင်နဲ့ TNLA တအာင်းအမျိုးသားတပ်မတော်တို့ကြား တိုက်ပွဲဖြစ်ပြီး မြို့ထဲလက်နက်ကြီးကျည်ကျကာ လူ ၁ ဦး သေဆုံး ၃ ဦး ဒဏ်ရာရသွားပါတယ်။
ဒီမနက်စောစော ၅ နာရီကျော်လောက်ကတည်းက သီပေါမြို့ပြင် ကျင်သီတံတားအနီးနဲ့ မန်လွိုင်ကျေးရွာဘက်မှာ ပစ်ခတ်သံတွေ စကြားရပြီး တဖြည်းဖြည်းမြို့ထဲနီးကပ်လာကြောင်း ၊ ဒီနောက် စံဖိတ်ရပ်ကွက်ထဲကို လက်နက်ကြီးကျည်ကျပြီး လူ ၁ ဦးပွဲချင်းပြီး သေဆုံး ၃ ဦးဒဏ်ရာပြင်းထန် ၅ ဦးက မစိုးရိမ်ရဒဏ်ရာရခဲ့တယ်လို့ သီပေါမြို့ခံက ပြောပါတယ် ။
“စံဖိတ်ရပ်ကွက်ထဲကို လက်နက်ကျည် လေး လုံးကျတယ်။ ဘယ်ဘက်ကပစ်တဲ့ကျည်လဲတော့ မသိပါဘူးခင်ဗျ။ ပရိဘောဂလုပ်တဲ့ အိမ် တအိမ်ကိုထိပြီး အိမ်ရှင် ဦးဉာဏ်ဌေးက ပွဲချင်းပြီး ဆုံးသွားပါတယ်။ နောက်ထပ် သုံးယောက်က ဒဏ်ရာပြင်းထန်ပြီး ပရဟိအဖွဲ့တွေက လားရှိုးဆေးရုံကိုပို့လိုက်တယ်။ အဲဒီထဲမှာ နှစ်ယောက်က စိုးရိမ်ရတယ်လို့ပြောတယ်။ နောက်ထပ် ၅ ယောက်ကတော့ ဒဏ်ရာနည်းနည်းပါးပါးပဲရပြီး သီပေါဆေးရုံမှာ ဆေးထည့်ရ တယ်လို့ သိရပါတယ်။ ”
မနက်ကတိုက်ပွဲတွေကြောင့် မန်လွိုင်နဲ့ နမ့်ဆိမ်ကျေးရွာက ရွာသားတွေ သီပေါ နောင်ကတ်ဘုန်းကြီးကျောင်းကို ရာနဲ့ချီစစ်ဘေးရှောင်လာပြီး လူဦးရေစာရင်းကောက်နေဆဲမို့ အတိအကျမသိရသေးပါဘူး။
ဘိုးတော်ကျောင်းတိုက်မှာလည်း စစ်ရှောင်အချို့ရောက်နေကြပြီး ခါလိုင်းရွာသားတွေဟာ လည်း စစ်ဘေးရှောင်ချင်လို့ လူမှုကယ်ဆယ်ရေးအဖွဲ့တွေကို လာကြိုပေးဖို့ အကြောင်းကြားထားပေမဲ့ ကယ်ဆယ်ရေးဘက်ကတော့ တိုက်ပွဲတွေဖြစ်နေလို့ သွားခေါ် လို့ မရသေးဘူးလို့ ဆိုပါတယ်။
သီပေါမြို့အဝင် မုဥ်ဦးနားမှာလည်း မပေါက်ကွဲသေးတဲ့ ဗုံး ၁ လုံးရှိပြီး ဘယ်အဖွဲ့အစည်းကမှ လာရောက်ရှင်းလင်းပးတာမရှိလို့ ဘယ်သူမှလည်း အနားမကပ်ရဲဘူးလို့ ဆိုပါတယ် ။
ဒီကနေ့ ပစ်ခတ်သံတွေဟာ မနက် ၅ နာရီကနေ မွန်းလွဲ ၁ နာရီကျော်ထိ ကြားရပြီး ညနေပိုင်းငြိမ်နေပေမယ့် ညကျရင် TNLA က သီပေါမြို့ထဲဝင်မယ်ဆိုတဲ့ သတင်းတွေလည်း ထွက်ပေါ်နေတာကြောင့် မြို့နေလူထုတွေကြား စိုးရိမ်စိတ်တွေကြီးမားနေတယ်လို့ ဒေသခံက ပြောသွားပါတယ်။
သီပေါမြို့နယ် ကျင်တီတံတားမှာ စစ်ကောင်စီတပ်နဲ့ TNLA တို့ ဒီမနက် ၆ နာရီခွဲလောက်က တိုက်ပွဲဖြစ်ပွားခဲ့သလို နမ့်ခမ်းမြို့ စစ်ကောင်စီ စခန်းသစ်ကုန်းမှာလည်း စစ်ကောင်စီတပ်နဲ့ TNLA တို့ ဒီမနက် ၈ နာရီ ၄၀ မိနစ်အထိ တိုက်ပွဲဖြစ်ပွားခဲ့တယ်လို့ TNLA ကထုတ်ပြန်ပါတယ်။
တပ်မဟာ(၆)စစ်ဒေသ၊ လားရှိုးမြို့နယ် စစ်ကောင်စီ မိုင်းကျက်တပ်စခန်းကိုလည်း မနေ့ မနက် ၆ နာရီ ၄၅ မိနစ်လောက်က တအာင်းတပ်မတော် PSLF/TNLA မှ တိုက်ခိုက်ခဲ့ပါတယ်။
