ကေအန်ယူ တပ်မဟာ ၆ နယ်မြေ ဒူးပလာယာခရိုင်၊ ကော့ကရိတ်ခရိုင်အတွင်းက ဌာနဆိုင်ရာဝန်ထမ်းတွေ စစ်ကောင်စီအုပ်ချုပ်ရေး ယန္တရားကနေ ၇ ရက်အတွင်း အမြန်ဆုံးထွက်ခွာသွားပေးဖို့ ကော့ကရိတ်မြို့နယ်၊ အမြဲတမ်းကော်မတီက နိုဝင်ဘာ ၁၇ ရက်မှာ ထုတ်ပြန်သတိပေးလိုက်ပါတယ်။
အခုထုတ်ပြန်ချက်ကို မလိုက်နာရင် နောက်ဆက်တွဲ ပြဿနာတွေကို တာဝန်ယူမှာ မဟုတ်ဘူးလို့ အမြဲတမ်းကော်မတီက အသိပေးထုတ်ပြန်ထားပါတယ်။
ပြီးခဲ့တဲ့ နိုဝင်ဘာ ၂ ရက်နေ့ မနက် ၄ နာရီလောက်က ကြာအင်းဆိပ်ကြီးမြို့မှာ အုပ်ချုပ်ရေးယန္တရားတွေ ရပ်တန့်စေဖို့ ထွေအုပ်ရုံး၊ မီးသတ်၊ ရဲစခန်းနဲ့ တပ်စခန်းတွေအပြင် ထိုင်း-မြန်မာနယ်စပ်အနီးက ကွီးလုံတိုင်တပ်စခန်း၊ ကနဲလေးတပ်စခန်းတွေကို KNLA ပူးပေါင်းတပ်ဖွဲ့တွေက တိုက်ခိုက်ခဲ့ပါသေးတယ်။
ကရင်ပြည်နယ်အတွင်း တပ်မ ၂၂ ဌာနချုပ်၊ တပ်ရင်းတွေ၊ သံလွင်တံတားစစ်ဆေးဂိတ်၊ မြဝတီခရိုင်ရဲတပ်ဖွဲ့မှူးရုံး၊ ကော့ကရိတ် လဝကရုံး၊ ကြာအင်းဆိပ်ကြီး၊ ကမမောင်းနဲ့ ဖာပွန်မြို့နယ်အုပ်ချုပ်ရုံးမှူးရုံးတွေအပါအဝင် ဌာနဆိုင်ရာရုံးတွေကို တော်လှန်ရေးအင်အားစုတွေက တိုက်ခိုက်တာတွေ လုပ်ဆောင်ခဲ့ပါတယ်။
