ရခိုင်ပြည်နယ် မြောက်ဘက်အစွန်ဆုံး မြန်မာ-ဘင်္ဂလား-အိန္ဒိယ နယ်စပ်ရှိ ဒုံးညိုစခန်းကို ရက္ခိုင့်တပ်တော် (အေအေ) က နိုဝင်ဘာ ၁၆ ရက် မွန်းတည့် ၁၂ နာရီကျော်မှာ သိမ်းပိုက်လိုက်တာကြောင့် စစ်ကောင်စီက MI-35 ရဟတ်ယာဉ်နဲ့ ဗုံးကြဲတိုက်ခိုက်ခဲ့တယ်လို့ ဒုံးညိုကျေးရွာ ဒေသခံတွေက ပြောပါတယ်။
“အေအေက ဒုံးညိုကျေးရွာက နယ်ခြားစောင့်စခန်းကို ထိုးစစ်ဆင်တိုက်ခိုက်တာ။ လေကြောင်းကလာပြီး ကျေးရွာတွေကို ဗုံး ၃ လုံးကြဲချခဲ့တာ။ ရွာသူရွာသားတွေအားလုံး ဗုံးကျင်းတွေမှာ ခိုနေရတယ်။”
လက်ရှိမှာ အေအေက ဗန္ဓုလစခန်းနဲ့ နယ်မြေ ၁ အောင်သပြေစခန်းတို့ကို လက်နက်ချဖို့ ကမ်းလှမ်းထားကြောင်း ဒေသခံတဦးက ပြောပါတယ်။
“ဗန္ဓုလစခန်းနဲ့ အောင်သပြေနယ်မြေကိုတော့ မတိုက်သေးဘူးဗျ။ လက်နက်ချဖို့ ပြောထားတယ်လို့တော့ သိရတယ်။ နောက်ထပ် ဘယ်လိုတွေဖြစ်လာမလဲတော့ မပြောတတ်ဘူး။”
လက်ရှိ မောင်တောခရိုင်ဖြစ်တဲ့ ဘူးသီးတောင်၊ မောင်တော နယ်ခြားစောင့်စခန်းကြီးတွေအနီးကို စစ်ကောင်စီက လက်နက်ကြီးပစ်ကူတွေ၊ လေကြောင်းပစ်ကူတွေ ပြုလုပ်နေပါတယ်။
