စစ်ကိုင်းတိုင်း၊ ကသာမြို့မှာ နိုဝင်ဘာ ၁၃ ရက် ညက တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တဲ့အတွက် မြေးအဘွားနှစ်ဦး သေဆုံးခဲ့ကြောင်း သိရပါတယ်။

ကသာမြို့အခြေစိုက် ခြေမြန်တပ်ရင်း ခမရ ၃၀၉ က လက်နက်ကြီးနဲ့ ပစ်ခတ်ခဲ့တဲ့အတွက် အမှတ် ၅ ရပ်ကွက်က နေအိမ်တလုံးပေါ်ကို ကျရောက်ပေါက်ကွဲပြီး မြေးအဘွားနှစ်ဦး သေဆုံးခဲ့ကြောင်း ဒေသခံတွေဆီက သိရပါတယ်။

ဒေသခံအမျိုးသားတဦးက “လူတွေလည်း အိပ်နေကြတဲ့အချိန် ည ၁၁ နာရီလောက် လက်နက်ကြီးနဲ့ ထပစ်နေတာ။ တိုက်ပွဲလည်း ဖြစ်တာမရှိဘူး။ အဲ့ဒါ ၅ ရပ်ကွက်ထဲက နေအိမ်ပေါ် လက်နက်ကြီးကျည် ကျတယ်။ အိမ်ထဲအိပ်နေတဲ့ မြေးအဘွားနှစ်ဦး သေသွားတယ်” လို့ ပြောပါတယ်။

ခြေမြန်တပ်ရင်း ခမရ ၃၀၉ က လက်နက်ကြီးနဲ့ ပစ်ခတ်ခဲ့တဲ့အတွက် အမှတ် ၅ ရပ်ကွက်က အသက် ၇၀ ကျော် အဘွားအိုတဦးနဲ့ အသက် ၁၂ နှစ်အရွယ် မြေး(မိန်းကလေး)တဦး လက်နက်ကြီးကျည် ထိမှန် သေဆုံးခဲ့တာပါ။

နိုဝင်ဘာ ၆ ရက်က ကောလင်းမြို့ကို တော်လှန်ရေးတပ်ဖွဲ့ဝင်တွေ တိုက်ခိုက်သိမ်းပိုက်ပြီး နောက်ပိုင်း စစ်ကောင်စီလက်အောက်ခံ ရဲစခန်း အပါအဝင် အခြေခံပညာကျောင်းတွေ၊ ဌာနဆိုင်ရာရုံးတွေ ပိတ်ထားပြီး Non CDM ဝန်ထမ်းတွေနဲ့ ကသာမြို့ ဒေသခံ အတော်များများဟာ တခြားမြို့နယ်တွေကို ရွှေ့ပြောင်းနေထိုင်ကြပါတယ်။