အမှတ် ၂ အိန္ဒိယ-မြန်မာနယ်စပ် ကုန်သွယ်ရေးလမ်းကြောင်းပေါ်က ရိဒ်ခေါဒါရ်မြို့ကို ချင်းပူးပေါင်းတပ်ဖွဲ့က တိုက်ခိုက်သိမ်းပိုက်ပြီးနောက် အိန္ဒိယ-မြန်မာ နယ်စပ်တံတားပေါ်မှာ နိုဝင်ဘာ ၁၄ ရက် မနက်ပိုင်းကစပြီး ချင်းအမျိုးသားအလံကို လွှင့်ထူခဲ့တယ်လို့ ဒေသခံတွေက ပြောပါတယ်။

နိုဝင်ဘာ ၁၂ ရက် ည ၁၁ နာရီက စတင်ပြီး ရိဒ်ခေါဒါရ် စစ်ကောင်စီစခန်းနဲ့ တီအိုချောင်း စစ်ကောင်စီစခန်းကို ဝင်ရောက်တိုက်ခိုက်ခဲ့တာမှာ နိုဝင်ဘာ ၁၃ ရက် မနေ့ ညနေပိုင်းမှာ ရိဒ်ခေါဒါရ်မြို့ကို သိမ်းပိုက်နိုင်ခဲ့တာ ဖြစ်ပါတယ်။

ရိခေါဒါရ်တိုက်ပွဲကို ချင်းအမျိုးသားတပ်ဦး (CNA/CNF) က ဦးဆောင်ပြီး CDF-Hualngoram၊ ထန်တလန်-CDF ဒရုန်းအဖွဲ့အပြင် တခြား ဒေသခံကာကွယ်ရေးအဖွဲ့တွေလည်း ပူးပေါင်းတိုက်ခိုက်ခဲ့တယ်လို့ သိရပါတယ်။

ဒေသခံတဦးက “တံတားပေါ်က စကစစစ်ဆေးရေးဂိတ်တွေကိုလည်း ကာကွယ်ရေးတပ်တွေက နေရာယူထားတယ်။ ဒီနေ့လယ်တော့ ပစ်သံမကြားရသေးဘူး။ ငြိမ်နေတဲ့သဘောရှိတယ်” လို့ ပြောပါတယ်။

တိုက်ပွဲအတွင်းမှာ စစ်ကောင်စီဘက်က လေကြောင်းပစ်ကူယူ ဗုံးကြဲတိုက်ခိုက်မှုနဲ့ လက်နက်ကြီးနဲ့ပစ်ခတ်လို့ အိန္ဒိယနိုင်ငံ၊ မီဇိုရမ်ပြည်နယ်ထဲက ဇိုခွါထာရ်ရွာထဲကို လက်နက်ကြီး ကျရောက်တာကြောင့် အရပ်သား ၂ ယောက် ဒဏ်ရာရရှိခဲ့တယ်လို့ သိရပါတယ်။

ရိဒ်ခေါဒါရ်မြို့ အမှတ်-၁၊ အမှတ်-၂ နဲ့ ဆက်သွယ်ထားတဲ့ လမ်းကြောင်းအားလုံးကို ကာကွယ်ရေးတပ်ဖွဲ့တွေက ပိတ်ထားလိုက်ပြီး အခြေအနေတည်ငြိမ်မှ ပြန်လည်ဖွင့်လှစ်မယ်လို့ CDF-Hualngoram က နိုဝင်ဘာ ၁၄ ရက်မှာ ထုတ်ပြန်ထားပါတယ်။