ပဲခူးတိုင်း၊ ဝေါမြို့နယ် ညောင်ခါးရှည် X-Ray စစ်ဆေးရေးဂိတ်မှာ စစ်ကောင်စီက စစ်ဆေးတဲ့အချိန်ကြာတာနဲ့ ကားတွေ စည်းကမ်းတကျမမောင်းကြတာကြောင့် ဟင်းသီးဟင်းရွက်နဲ့ အသားငါးလို ကြာကြာမခံတဲ့ ပစ္စည်းတွေ ပုပ်သိုး ပျက်စီး ကုန်တယ်လို့ ကားသမားတွေဆီက သိရပါတယ်။

နိုင်ငံအနှံ့မှာဖြစ်နေတဲ့ တိုက်ပွဲတွေကြောင့် ညောင်ခါးရှည် X-Ray ဂိတ်မှာ ‌နိုဝင်ဘာ ၃ ရက်နေ့ကစပြီး ကားတွေကို အသေးစိတ်စစ်ဆေးတာကြောင့် အချိန်ကြာမြင့်ပြီး ၂ ညအိပ်၊ ၃ ရက်လောက် စောင့်ဆိုင်းနေကြရတာပါ။

ဒါကြောင့် ငါး၊ ပုဇွန်နဲ့ အေးခဲအသားတွေ ရေခဲပျော်ပြီး ပုပ်သိုးပျက်စီးတာတွေဖြစ်တယ်လို့ စံပြငါးဈေးက ငါးကားမောင်းသူတဦးက ပြောပါတယ်

"ဂိတ်မှာက အ‌စစ်အဆေးလည်း တင်းကျပ်သွားသလို တယောက်နဲ့ တယောက် လုမောင်းနေတာလည်းရှိတော့ယာဉ်တန်းက ၅ ထပ်၊ ၆ ထပ်လောက် ဖြစ်ပြီး ထွက်လို့မရတော့တာ။ အဲနေရာက ကွင်းပြင်ကြီးလေ၊နေက ပုံမှန်ထက်ပိုပူတော့ ရေခဲတွေပျော်ပြီး အသားငါးတွေ မလတ်ဆတ်တာတို့၊ ပုပ်သိုးတာ‌တို့ရတာပေါ့။ အရင်က ရန်ကုန်စံပြငါးဈေးနဲ့ ကျိုက်ထိုနဲ့ဆိုရင် ၃ နာရီလောက်ပဲ မောင်းရတယ်။ရန်ကုန် မနက် ၆ နာရီလောက်ထွက်ရင် ကျိုက်ထိုကို မနက် ၉ နာရီ ၁၀ နာရီဆိုရောက်ပြီ။အခုဆိုရင် ညဘက်ရောက်ရင်တောင် တော်တော်ကံကောင်းတယ်ဆိုရမှာ" လို့ ပြောပါတယ်။ငါး၊ ပုဇွန်နဲ့အသားတွေ ပျက်စီးတာနည်းအောင် ရေခဲကို ၂ ဆ၊ ၃ ဆထည့်နေရတာကြောင့်ကုန်ကျစရိတ် ပိုများသွားပြီး  အသား၊ ငါးတွေဈေးတက်လာတယ်လို့လည်း သူက ပြောပါတယ်။

နယ်က ကုန်သည်တယောက်ကလည်း “ကုန်က မှာထားရင် ၂ ည ၃ ညမှ ရောက်ရင် ပန်းတွေဆို ဒီရောက်တာနဲ့ နွမ်းပြီ။ ရောင်းတာ အဆင်မပြေဘူး။ တခြား သားငါးတွေလည်း အချိန်မီ မပို့နိုင်ရင် လမ်းမှာပဲ ရက်လွန်ရင် ပုပ်ကုန်တာနဲ့ကြုံရတယ်” လို့ ပြောပါတယ်။

ကုန်စိမ်းရောင်းဝယ်သူတယောက်ကတော့ အခုလို့ ကြန့်ကြာနေတဲ့အတွက် ပုပ်သိုးလွယ်တဲ့ ဟင်းသီးဟင်းရွက်တွေ တင်ပို့တာကို ခဏ ရပ်ထားတယ်လို့ ပြောပါတယ်။

နိုဝင်ဘာ ၉ ရက်နေ့ကလည်း X-Ray ဂိတ်မှာ အချိန်ကြာ စောင့်ဆိုင်းနေရတဲ့အတွက် ဆီဘောက်ဆာမောင်းတဲ့ ကားသမားတဦး လေဖြန်းသွားတယ်လို့ ဒေသခံ ပရဟိတသမားတွေက ပြောပါတယ်။

ဒါ့အပြင် အဲဒီဂိတ်က ဖြတ်သွားရတဲ့ ခရီးသည်တွေအတွက်လည်း အစားအသောက်၊ သောက်ရေနဲ့အပေါ့အပါးသွားဖို့အတွက် အခက်အခဲတွေရှိတယ်လို့ ခရီးသွား တယောက်က ပြောပါတယ်။

ညောင်ခါးရှည် X-Ray ဂိတ်အပြင် ကျိုက်ထို မရမ်းချောင် စစ်ဆေးရေးဂိတ်မှာလည်းရဲတွေက ခရီးသည်တင်ယာဉ်နဲ့ ကုန်တင်ယာဉ်တွေကို အသေးစိတ် စစ်ဆေးနေတဲ့အတွက်  လမ်းပိတ်ဆို့နေပါတယ်။

အခုလို လမ်းပိတ်ဆို့နေတာကြောင့် မွန်ပြည်နယ်အတွင်း စက်သုံးဆီတွေ ပြတ်လပ်တာကိုပါ ကြုံနေရတယ်လို့ ဆိုပါတယ်။