ကချင်ပြည်နယ် မြစ်ကြီးနား-မိုးကောင်း မီးရထားကို စစ်ကောင်စီ ပြည်နယ်ဝန်ကြီးချုပ်က ၁ လတိတိ အခမဲ့စီးနင်းခွင့်ပြုပေမဲ့ စီးနင်းသူ ခရီးသွားအနည်းငယ်သာ ရှိတယ်လို့ ဒေသခံတွေက ပြောပါတယ်။

မိုးကောင်းဒေသခံ ပြည်သူ့ကာကွယ်ရေးတပ်ဖွဲ့က လုံခြုံရေးအရ တာဝန်မယူကြောင်း ထုတ်ပြန်ပြီးနောက် ပြည်နယ်ဝန်ကြီးချုပ်က မိုးကောင်း-မြစ်ကြီးနား မီးရထားကို ၁ လတိတိ အခမဲ့ စီးနင်းခွင့်ပြုခဲ့ပေမဲ့ စီးနင်းသူ ခရီးသွားတွေမရှိဘဲ ရဲတပ်ဖွဲ့ဝင်တွေသာ အစုန် အဆန် လိုက်ပါစီးနင်းနေကြတယ်လို့ ဆိုပါတယ်။

“ရထားက ၃ တွဲပဲရှိတယ်။ ရထားပြန်ထွက်ပြီဆိုတာ အဖြစ်ပဲလုပ်နေတာ။ ပထမတွဲမှာ ရာသီပေါ်သီးနှံခြင်း ၃ ခြင်းရယ်၊ ပိုက်ဆံတောင်းတဲ့ အဘိုးအဘွား ၃ ဦးရယ်ပဲ ရှိတယ်။ အလယ်တွဲမှာကြတော့ သေနတ်တွေကိုင်ထားတဲ့ ရဲ ၁၅ ဦးလောက်ရှိတယ်။ နောက်အတွဲကတော့ အလုံပိတ်ထားတော့ ခရီးသည်တော့ ရှိမှာမဟုတ်ဘူး။ ဘာတွေတင်ထားလဲတော့ မသိရဘူး” လို့ မျက်မြင်တွေ့ရှိခဲ့သူ ဒေသခံတဦးက ပြောပါတယ်။

မြစ်ကြီးနား-မန္တလေး ရထားလမ်းပိုင်းမှာ ရထားသံလမ်း တံတားအတော်များများ ပျက်စီးနေပြီး မြစ်ကြီးနားကနေ မိုးကောင်းရထားလမ်းအပိုင်းသာ ကောင်းမွန်စွာ အသုံးပြုနိုင်တဲ့အတွက် မြစ်ကြီးနား-မိုးကောင်းနဲ့ မိုးကောင်း-မြစ်ကြီးနား အစုံ အဆန် မီးရထားခရီးစဉ်ကို မနက် ၇ နာရီမှာ မိုးကောင်းဘူတာကနေ မြစ်ကြီးနားကို စတင်ထွက်ခွာမှာဖြစ်ပြီး မြစ်ကြီးနားဘူတာကနေ နေ့လယ် ၂ နာရီ မိုးကောင်းကို ပြန်လည်ထွက်ခွာမှာ ဖြစ်ပါတယ်။

“မီးရထား စပြေးဆွဲတဲ့နေ့ကလည်း မီးရထားစီးမယ့်သူ မရှိဘူး။ ကျောင်းက ကလေးတွေကို ခေါ်ရတယ်။ ရပ်ကွက်ထဲက ကလေးတွေကိုလည်း အုပ်ချုပ်ရေးမှူးကတဆင့် ခေါ်ပြီး ဖွင့်ပွဲလုပ်ရတယ်။ ပထမတုန်းကတော့ ၁ ပတ်ပဲ အခမဲ့စီးခွင့်ပြုမယ်။ နောက်ပိုင်း စီးတဲ့သူလည်းမရှိကော ပြည်နယ်ဝန်ကြီးက ၁ လ အခမဲ့စီးခွင့်ပြုမယ် ကြေညာတယ်။ အဲ့ဒါလည်း စီးတဲ့ ခရီးသွားတွဲတတွဲ မပြည့်ဘူး။ ရဲတွေချည်းပဲ အစုန် အဆန် ရထားစီးနေကြတယ်”  လို့ မီးရထားဝန်းအတွင်း နေထိုင်သူတဦးက ပြောပါတယ်။

စစ်ကောင်စီက  မိုးကောင်း-မြစ်ကြီးနား ရထားလမ်းပိုင်းကို နိုဝင်ဘာ ၁ ရက်က စတင်ကာ  အခမဲ့ လိုက်ပါစီးနင်းခွင့်ပြုမှာ ဖြစ်တဲ့အတွက် မိဘပြည်သူတွေအနေနဲ့ စစ်ကောင်စီက မည်သို့ပင် မြူဆွယ်စေကာမူ မီးရထားစီးနင်းခြင်း မပြုလုပ်ကြဖို့နဲ့ လိုက်ပါစီးနင်းကြမယ့် ပြည်သူတွေရဲ့ လုံခြုံရေးကို မိုး​ကောင်းမြို့နယ် ပြည်သူ့ကာကွယ်ရေးတပ်ဖွဲ့က လုံးဝ တာဝန်မယူကြောင်း Moegaung KPDF က အောက်တိုဘာ ၃၁ ရက်မှာ  ထုတ်ပြန်ထားပါတယ်။

Photo-ပြည်နယ်ပြန်ဆက်