ချင်းပြည်နယ်၊ ပလက်ဝမြို့နယ်၊ ဆမီးမြို့မှာ ကင်းစောင့်ပြီးပြန်လာတဲ့ စစ်ကောင်စီ တပ်သားတွေကို ချင်းအမျိုးသားတပ်ဦး (CNA/CNF) က တိုက်ခိုက်ခဲ့ရာ ၃ ဦးသေဆုံးပြီး ၁ ဦး ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
နိုဝင်ဘာ ၄ ရက် မနက် ၁ နာရီက ဆမီးမြို့ လန်အာလွှဲဂိတ်မှာ ကင်းစောင့်တဲ့ စစ်ကောင်စီတပ်သား ၄ ဦး ဘားဝရပ်ကွက်၊ ဆမီးချောင်းဖျားက မိမိတို့စခန်း ပြန်တဲ့အချိန် CNA က ကြားဖြတ်တိုက်ခိုက်ခဲ့တာ ဖြစ်ပါတယ်။
တိုက်ခိုက်ခံရမှုကြောင့် တပ်ကြပ်ကြီး အပါအဝင် စစ်ကောင်စီတပ်သား ၃ ဦး သေဆုံးခဲ့ပြီး ၁ ဦး ဒဏ်ရာရရှိခဲ့တယ်လို့ CNA နဲ့ နီးစပ်သူတွေက ပြောပါတယ်။
အပြန်အလှန် ပစ်ခတ်မှုဖြစ်ပွားချိန် ဘားဝရပ်ကွက်က ၅ လအရွယ် ကလေးရဲ့မိခင် အသက် ၃၀ အရွယ် ဒေါ်အေးမိုးသွယ် ကျည်ထိမှန်ပြီး ပြင်းထန်ဒဏ်ရာရရှိခဲ့လို့ ပလက်ဝဆေးရုံမှာ ဆေးကုသမှု ခံယူနေရတယ်လို့ ဒေသခံတွေက ပြောပါတယ်။
ဆမီးမြို့ခံတဦးက “စစ်သားတွေက ဘာဝရပ်ကွက်နဲ့ ၂ ဖာလုံလောက်ဝေးတဲ့ လန်အာလွှဲဂိတ်ကနေ ည ၁၂ ကင်းပြီးလို့ ပြန်လာကြတာ။ အဲ့ဒီအချိန် အတိုက်ခံရတာလို့ ကြားတယ်။ ကလေးအမေက ခါးမှာ ကျည်ထိသွားတယ်၊ ဆမီးဆေးရုံမှာ ကျည်ထုတ်ပေးဖို့ ဆရာဝန်မရှိလို့ ပလက်ဝဆေးရုံကို လွှဲလိုက်ရတယ်” လို့ ပြောပါတယ်။
ပြီးခဲ့တဲ့ စက်တင်ဘာ ၁၆ ရက်ကလည်း ဆမီးမြို့က ယာယီရဲစခန်းမှူးကို လက်နက်ကိုင်အဖွဲ့တခုက ဖမ်းဆီးသွားပြီးနောက်ပိုင်း စစ်ကောင်စီတပ်က မြို့တွင်းနေ ပြည်သူတွေကို လုံခြုံရေး တင်းကျပ်ထားပါတယ်။
