ရှမ်းပြည်နယ်မြောက်ပိုင်း ကျောက်မဲမြို့မှာရှိတဲ့ စစ်ကောင်စီရဲ့ ၅၀၂ တပ်စခန်းက လက်နက်ကြီးတွေနဲ့ နောင်ပြစ်ကျေးရွာနားကို ပစ်ခတ်နေကြောင်း TNLA တပ်ဖွဲ့က သတင်းထုတ်ပြန်ပါတယ်။
နိုဝင်ဘာ ၁ ရက်၊ မနက် ၁၁ နာရီကျော်လောက်မှာ ပစ်ခတ်နေတာဖြစ်ပြီး အုမ္မခါးနဲ့ ဆမ်မဆယ်ကျေးရွာ ဘက်ကိုလည်း ဂျက်တိုက်လေယာဉ်နဲ့ ၂ ကြိမ်လာပစ်ကြောင်းလည်း ဆိုပါတယ်။
ကျောက်မဲဒေသခံတစ်ယောက်က “ဒီနေ့အတွင်းပဲကို ၈ ခါလောက်ရှိပြီ။ ၁၀ နာရီ ၁ မိနစ်ကနေ အခု ၁၂ နာရီအထိပေါ့။ လက်နက်ကြီးလား၊ ဗုံးလားတော့ မသိဘူး။ အသံတော့ အတော်ဩတယ်။ တစ်ချက်တစ်ချက်လေ။ တိုက်ပွဲလိုမျိုးတော့ မဟုတ်လောက်ဘူး။ အသံကြားတာက ကျောက်မဲရဲ့ ၅၀၁၊ ၅၀၂ ခလရ စစ်တပ်ဘက်၊ နောက်တစ်ခုက ကျောက်မဲရဲ့ ငြိမ်းချမ်းရေးကုန်းဆိုတာ အဲမှာလည်း ၂ ချက်ကြားတယ်။”
ကျောက်မဲမြို့ထဲမှာလည်း စစ်ကောင်စီတပ်က ညမထွက်ရအမိန့် ထုတ်ပြန်ထားပြီး ရဲစခန်းနဲ့ ထွေအုပ်လိုမျိုး သူတို့လက်အောက်ခံရုံးတွေ၊ စခန်းတွေကို ဆေးအမဲရောင်သုတ်ပြီး စစ်ရေးပြင်နေတဲ့ အနေအထားကို တွေ့ရကြောင်း ဒေသခံကဆိုပါတယ်။
“ကျောက်မဲထဲမှာတော့ အခု ဘဏ်တွေ၊ ရုံးတွေပိတ်ထားတယ်၊ ဆိုင်းဘုတ်တွေဖျက်ထားတယ်။ မြို့ကလူတွေကလည်း ဆန်တွေ၊ ဆီတွေ၊ ဆားတွေ သိုလှောင်ထားကြတယ်။ ဈေးတွေကလည်း ၅ နာရီဆို ပိတ်ပြီ။ မာရှယ်လောက ၅ နာရီရှိတယ်”
ဒါ့အပြင် ကျောက်မဲမြို့အတွင်း ဆန်ဆိုင်တချို့ပိတ်ထားကာ အခြေခံစားသောက်ကုန် ဈေးနှုန်းတချို့ မြင့်တက်နေပြီး နိုဝင်ဘာ ၁ ရက်နေ့ပေါက်ဈေးအရ စက်သုံးဆီ တစ်လီတာကို ၅၀၀၀ အထိ အရောင်းအဝယ်ဖြစ်နေကြကြောင်း ပြောပါတယ်။
ကျောက်မဲမြို့မှာတိုက်ပွဲဖြစ်တာမရှိသေးပေမယ့် ဖြစ်ပွားလာမှာကို ဒေသခံတွေက စိုးရိမ်နေကြပြီး ညီနောင်မဟာမိတ် (၃) ဖွဲ့ဘက်ကလည်း စစ်ဆင်ရေးဖော်၊ မဖော်ဆိုတာကို ထုတ်ပြောတာ မရှိသေးပါဘူး။
ဒါပေမဲ့ ညီနောင်မဟာမိတ် ၃ ဖွဲ့ထဲက MNDAA ပြောခွင့်ရသူကတော့ နိုဝင်ဘာ ၁ ရက်နေ့မှာ ကွမ်းလုံမြို့နယ်မှာရှိတဲ့ စစ်ကောင်စီတပ် တပ်ရင်း ၁၂၇ အနီးတိုက်ပွဲဖြစ်နေပြီး သိန္နီမြို့နယ်ထဲက နေရာတချို့မှာလည်း တိုက်ပွဲတွေဆက်ဖြစ်နေတယ်လို့ ပြောပါတယ်။
