ရှမ်းပြည်နယ်မြောက်ပိုင်း၊ နမ့်လန်မြို့၊ နမ့်လန်-ကျောက်ဂူ လမ်းမကြီးပေါ်မှာ အောက်တိုဘာ ၁၉ ရက် နေ့လယ်ပိုင်းက ပြောင်းအိတ်တင်ကား တိမ်းမှောက်ပြီး တောင်သူ ၅ ဦး ဒဏ်ရာရရှိခဲ့တယ်လို့ နမ့်လန်ပရဟိတအသင်းက ပြောပါတယ်။
အဆိုပါကားဟာ လေးလုံးထိုးအင်ဂျင် တပ်ဆင်ထားတဲ့ ထော်လာဂျီဖြစ်ပြီး ထိခိုက်မိသူတွေဟာ ရှမ်းတောင်ဒေသကနေ နမ့်လန်မြို့ကို ပြောင်းဖူးတွေ လာရောင်းချတဲ့ တောင်သူတွေ ဖြစ်ပါတယ်။
နမ့်လန်ပရဟိတအသင်းဝင်တဦးက “အဲ့နေရာက ကားခဏခဏ မှောက်တယ်။ မြို့အဝင်မှာ ကားက ဘရိတ်ပေါက်ပြီး သုံးလေးပတ်လောက် လိမ့်သွားတာ။ ရှမ်းတောင်ဘက်ကနေ မြောက်ဘက်ကို ပြောင်းလာရောင်းတာ။ လူနာက အားလုံး ၅ ယောက်။ သူတို့က ကုံးသာရွာကလာတာ” လို့ ပြောပါတယ်။
ယာဉ်တိမ်းမှောက်မှုကနေ အသက် ၁၂ နှစ်အရွယ် မိန်းကလေး ၁ ဦး၊ အသက် ၂၈ နှစ်အရွယ် အမျိုးသမီး ၁ ဦး၊ အသက် ၄၀ ကျော်အရွယ် အမျိုးသမီး ၂ ဦးနဲ့ ယာဉ်မောင်း အသက် ၂၄ နှစ်ဖြစ်သူ အမျိုးသား ၁ ဦးတို့မှာ ဦးခေါင်းကွဲ၊ ခြေထောက်ပြတ်ရှ၊ ပွန်းပဲ့ဒဏ်ရာတွေ ရရှိခဲ့ပါတယ်။
ထိခိုက်ခဲ့သူတွေကို နမ့်လန်ကယ်ဆယ်ရေးအသင်းယာဥ်တွေနဲ့ နမ့်လန်ဆေးရုံကြီးကို အရေးပေါ် ကူညီပို့ဆောင်ပေးထားပါတယ်။
ပြီးခဲ့တဲ့ ဧပြီ ၂ ရက်ကလည်း နမ့်လန်-သီပေါ ကားလမ်းမမှာ မှန်လုံကားတစီး ချောက်ထဲ ပြုတ်ကျခဲ့ရာက ကားပေါ်ပါ လူ ၄ ဦး သေဆုံးခဲ့ပါတယ်။
