အက်စတန်ဗီလာနည်းပြ အူနိုင်းအမ်မရီကြောင့် ဘောလုံးအမြင်တွေ ပြောင်းလဲသွားခဲ့ကြောင်း အင်္ဂလန် တိုက်စစ်မှူး ဝက်စ်ကင်က ပြောပါတယ်။
အသက် ၂၇ နှစ်ရှိ တိုက်စစ်မှူးဟာ သြစတြေးလျကို ၁ ဂိုး ဂိုးမရှိနဲ့ အနိုင်ရတဲ့ ပွဲစဉ်မှာ အင်္ဂလန်အသင်းအတွက် တစ်လုံးတည်းသောအနိုင်ဂိုးကို သွင်းယူခဲ့တာပါ။
ဝက်စ်ကင်ဟာ ပရီးမီးယားလိဂ် ၈ ပွဲကစားအပြီးမှာလည်း ၄ ဂိုးသွင်း၊ ၄ ကြိမ် ဂိုးဖန်တီးနိုင်ခဲ့ပြီး နည်းပြအမ်မရီက သူ့ကို ပြောင်းလဲစေခဲ့ကြောင်း ဝက်စ်ကင်က ပြောပါတယ်။
“နည်းပြအူနိုင်းအမ်မရီက ကျနော့်ကို ယုံကြည်မှုတွေအများကြီးပေးပါတယ်။ လွန်ခဲ့တဲ့ ၁၈ လ အတွင်းမှာ အမှန်တကယ် ခြေစွမ်းတိုးတက်လာတယ်လို့လည်း ခံစားမိပါတယ်။ ကျနော့်ရဲ့ လက်ရှိ ခြေစွမ်းနဲ့ စွမ်းဆောင်နိုင်မှုတွေကို ပြသနိုင်ခဲ့ပြီး အင်္ဂလန်အသင်းဂျာစီကို ပြန်လည် ဝတ်ဆင်ခွင့်ရတာဟာလည်း အလွန်ကျေနပ် ဂုဏ်ယူစရာကောင်းပါတယ်” လို့ ဝက်စ်ကင်က ပြောပါတယ်။
သူဟာ ဟယ်ရီကိန်းနဲ့ လုံးဝမတူတဲ့ ကစားပုံရှိတဲ့ တိုက်စစ်မှူးဖြစ်ပြီး မတူညီတဲ့ ကွဲပြားခြားနားမှုတွေ ရှိတယ်လို့ ပြောပါတယ်။
Photo-Reuters
