မြန်မာ့ဂီတလောကထဲက နာမည်ကြီး ဟာမိုနီအဖွဲ့တခုဖြစ်တဲ့ ခရီးသွားငါးယောက် Everglades Harmony အဖွဲ့က တေးသံရှင်တယောက်ဖြစ်တဲ့ ကိုမောင်မောင်သန့်ဟာ အောက်တိုဘာ ၁၄ ရက် ဒီနေ့မနက်ပိုင်းမှာ ကွယ်လွန်သွားခဲ့ပြီလို့ ဂီတအသိုင်းအဝိုင်းက ပြောပါတယ်။
ကိုမောင်မောင်သန့်ဟာ ရန်ကုန်၊ လမ်းမတော်မြို့နယ်၊ ပြည်လမ်းမှာရှိတဲ့ ရန်ကုန် အထွေထွေရောဂါကုဆေးရုံသစ်(ဂျပန်ဆေးရုံ)မှာ မနက် ၅ နာရီ ၁၀ မိနစ်ခန့်က အစာအိမ်ကင်ဆာရောဂါနဲ့ ကွယ်လွန်သွားခဲ့တာပါ။
ကွယ်လွန်ချိန်မှာ အသက် ၅၄ နှစ်ရှိပြီလို့သိရပြီး ဇနီးနဲ့ သားသမီး ၃ ဦး ကျန်ရစ်ခဲ့ကာ Everglades Harmony အဖွဲ့ရဲ့ တေးသံရှင်တဦးအဖြစ် ၂၅ နှစ်ကျော် လက်တွဲခဲ့သူ ဖြစ်ပါတယ်။
ခရီးသွားငါးယောက်က ဆရာမ Tracy က “ဒီမနက် ၅ နာရီ ၁၅ မိနစ်လောက်မှာ ကွယ်လွန်သွားပါတယ်။ အသက်က ၅၄ နှစ်လောက်ရှိပါပြီ။ သူက အစာအိမ်ကင်ဆာ ဖြစ်တဲ့အတွက် ဆေးရုံမှာတင်ထားတာပါ။ ဆေးရုံမှာပဲ ဆုံးသွားပါတယ်” လို့ ပြောပါတယ်။
Everglades အဖွဲ့ဟာ ၁၉၉၇ ခုနှစ် မတိုင်ခင်ကတည်းက ဂီတနယ်ပယ်မှာ ဟာမိုနီအဖွဲ့အနေနဲ့ ရပ်တည်ခဲ့ကြပြီး ၁၉၉၇ ခုနှစ်မှာ ထွက်ရှိတဲ့ သီချင်း ၁၃ ပုဒ်ပါ ခရီးသွား ၅ ယောက် သီချင်းစီးရီးဟာ မြန်မာပရိသတ်ကြားမှာ နာမည်ကြီးပါတယ်။
ကိုမောင်မောင်သန့် ကွယ်လွန်တာနဲ့ပတ်သက်ပြီး Everglades ဟာမိုနီအဖွဲ့အပါအဝင် ဂီတလောကသားတွေကပါ ဝမ်းနည်းကြောင်းကို လူမှုကွန်ယက်မှာ မျှဝေနေကြပြီး ကွယ်လွန်သူ ဈာပနနဲ့ပတ်သက်လို့ မိသားစုဝင်တွေက ဆက်လက် လုပ်ဆောင်နေပါတယ်။
