ကရင်နီ(ကယား)ပြည်နယ်၊ ဒီမော့ဆိုမြို့နယ် အနောက်ဘက်ခြမ်းက ကန်သာယာ စစ်ရှောင်စာသင်ကျောင်းမှာ လိုအပ်နေတဲ့ သင်ထောက်ကူနဲ့ စာရေးကိရိယာတွေကို အောက်တိုဘာလ ၁၁ ရက်က သွားရောက်ကူညီ လှူဒါန်းပေးခဲ့တယ်လို့ Medit Unit ဆေးအဖွဲ့ တာဝန်ရှိသူတယောက်က ပြောပါတယ်။
စစ်ဘေးရှောင်စာသင်ကျောင်းက ကျောင်းသားကျောင်းသူတွေ သင်ထောက်ကူပစ္စည်း လိုအပ်ချက်တွေကို အကူအညီတောင်းခံလာတာကြောင့် သွားရောက်လှူဒါန်းပေးခဲ့တာလို့ ဆိုပါတယ်။
"ကိုယ်ထူကိုယ်ထ ပညာရေးစနစ် စသင်နေတာက ၂ နှစ်ကျော်လာပြီ။ အကူညီတွေတောင်းခံလာလို သွားရောက်လှူဒါန်းခဲ့တာ။ ကလေးတွေကို စစ်အုပ်စုလို ပညာမတတ်တာ မဖြစ်စေချင်ဘူး။ မျိုးဆက်သစ်ကို ပညာတတ်စေချင်တယ်။ အနာဂတ် လှစေချင်တယ်။ ကလေးတွေမှာ ပညာမရှိလို့ မဖြစ်ဘူး။ အဓိက ပညာရေးက အရေးကြီးလို့ သွားလှူဖြစ်တယ်"လို့ ပြောပါတယ်။
ကန်သာယာစာသင်ကျောင်းမှာ စစ်ဘေးရှောင် ကလေးငယ်ပေါင်း ၄၀ ကျော် ပညာသင်ကြားနေပြီး KG တန်းကနေ Grade 5 အထိ ဖွင့်လှစ်ထားကာ စစ်ရှောင် ဆရာမ ၇ ယောက်က သင်ကြားပေးနေပါတယ်။
စာသင်ကျောင်းက ကလေးတွေအတွက် ဗလာစာအုပ်၊ ဘောပင်၊ ပေတံ၊ ခဲတံ၊ ခဲဖျက်၊ ကော်ရက်ရှင်ပန် စတဲ့ သင်ထောက်ကူပစ္စည်းတွေအပြင် အာဟာရအနေနဲ့ ပဲနို့၊ မုန့်၊ ချိုချဥ်တွေကိုပါ ကူညီလှုဒါန်းပေးခဲ့တယ်လို့ တာဝန်ရှိသူက ပြောပါတယ်။
စစ်ဘေးရှောင်စာသင်ကျောင်းက ဆရာမတွေဟာ ပညာဒါနအနေနဲ့ သင်ကြားပေးနေတာဖြစ်ပြီး လတ်တလောမှာလည်း Grade 1နဲ့ Grade 3 အတွက် ဖတ်စာအုပ်လိုအပ်ချက်တွေရှိနေတဲ့အပြင် ကလေးငယ် အယောက် ၂၀ ကျော်ဟာ ရာသီတုပ်ကွေးဖြစ်တာတွေနဲ့ ရင်ဆိုင်နေရတယ်လို့ ဆရာမတွေဆီက သိရပါတယ်။
