မန္တလေး၊ အောင်မြေသာစံမြို့နယ် အမှတ် ၄ နယ်မြေရဲစခန်းမှာ အောက်တိုဘာ ၁၀ ရက် မနေ့ည ၆ နာရီခွဲက လိုင်းကြေးတောင်းပြီး ပြန်လာတဲ့ နယ်ထိန်းတဦး သေနတ်နဲ့ပစ်ခတ်ခံရပြီး သေဆုံးသွားတယ်လို့ မြို့ခံတွေဆီက သိရပါတယ်။
အမှတ် ၄ နယ်မြေရဲစခန်းက နယ်ထိန်းတဦးဟာ မနေ့ည ၆ နာရီခွဲက အမရဌာနီရပ်ကွက်မှာ လိုင်းကြေးတောင်းပြီး ဆိုင်ကယ်နဲ့ ပြန်လာစဥ် ၇၉ × ၈၀ လမ်းကြားမှာ သေနတ်နဲ့ ပစ်ခတ်ခံရတာလို့ မြို့ခံတဦးက ဒီဗွီဘီကို ပြောပါတယ်။
“လိုင်းကြေးတောင်းပြီး ပြန်တဲ့အချိန် အနောက်ကနေ ဆိုင်ကယ်နဲ့ လိုက်ပစ်တာ၊ ခေါင်းကို ထိသွားတယ်။ ဆေးရုံပို့သေးတယ်၊ မန္တလေးဆေးရုံကြီးရောက်မှ သေသွားတာ။”
သေဆုံးသူမှာ အမှတ် ၄ နယ်မြေရဲစခန်းမှ နယ်ထိန်းရဲတပ်သား မိုးစန်းဦးဖြစ်ပြီး ဦးခေါင်းကျည် ထိမှန်ဒဏ်ရာတချက်နဲ့ မန္တလေးဆေးရုံကြီးမှာ သေဆုံးခဲ့တာလို့ ရဲအရာရှိနဲ့ နီးစပ်သူက ဒီဗွီဘီကို ပြောပါတယ်။
“စခန်းကတော့ သတင်းသွားယူတာလို့ ပြောတယ်။ ၇ ရက်နေ့ကမှ စစ်သားတယောက် ပစ်သတ်ခံထားရတာ။ လုံခြုံရေးသတိ ရှိရမှာပေါ့။ လိုင်းကြေးရဖို့အတွက်နဲ့ ရဲတယောက် ဆုံးရှုံးတယ်။”
ပစ်ခတ်မှုဖြစ်ပြီးနောက် စစ်ကောင်စီတပ်နဲ့ ရဲတွေဟာ အောင်မြေသာစံမြို့နယ် အမရဌာနီရပ်ကွက် ၉ လမ်း၊ ၇၉ × ၈၀ လမ်းမှာ စစ်ဆေးမှုတွေ ပြုလုပ်ခဲ့ပေမဲ့ သေနတ်နဲ့ ပစ်ခတ်သူကို ဖမ်းဆီးရမိတာ မရှိဘူးလို့ မြို့ခံတွေဆီက သိရပါတယ်။
ပြီးခဲ့တဲ့ အောက်တိုဘာ ၇ ရက် နေ့လယ် ၁ နာရီခွဲကလည်း အောင်မြေသာစံမြို့နယ်။ အောင်မြေသာစံရပ်ကွက် အုပ်ချုပ်ရေးမှူးရုံးရှေ့မှာ ကင်းစောင့်နေတဲ့ စစ်ကောင်စီတပ်က တပ်ကြပ်ကြီးတဦး သေနတ်နဲ့ပစ်ခတ်ခံလို့ သေဆုံးခဲ့တဲ့ဖြစ်စဥ်လည်း ရှိပါတယ်။
