အိန္ဒိယ-မြန်မာနယ်စပ်၊ မီဇိုရမ်ပြည်နယ်မှာ AK-47 ကျည်ဆန်နဲ့ ဖောက်ခွဲရေးပစ္စည်းတွေကို မီဇိုရမ်ပြည်နယ် ရဲတပ်ဖွဲ့က ဖမ်းဆီးရမိခဲ့တယ်လို့ မီဇိုရမ်ရဲတပ်ဖွဲ့က အောက်တိုဘာ ၉ ရက်မှာ ထုတ်ပြန်ပါတယ်။
အောက်တိုဘာ ၈ ရက် မွန်းလွဲ ၂ နာရီက ပြည်နယ်တွင်းက လန်ဘန်ကျေးရွာမှာ တရားမဝင် လက်နက်ခဲယမ်း သယ်ယူနေတယ်ဆိုတဲ့ သတင်းရထားတာကြောင့် ရဲတပ်ဖွဲ့တွေက စစ်ဆေးမှုတွေ ဆောင်ရွက်ခဲ့တယ်လို့ ဆိုပါတယ်။
အဆိုပါ စစ်ဆေးမှု ဆောင်ရွက်နေစဉ် အမည်မသိလူ ၂ ယောက်ကို စစ်ဆေးဖို့ ဆောင်ရွက်ချိန် အဲ့ဒီ အမျိုးသား ၂ ယောက်ဟာ မြန်မာဘက်ခြမ်း ကုလားတန်မြစ်ဘက်ကို ထွက်ပြေးသွားပြီး သူတို့ကျကျန်ခဲ့တဲ့ အိတ်အတွင်းကနေ လက်နက်ခဲယမ်းတွေ သိမ်းဆည်းရမိခဲ့တာလို့ ဆိုပါတယ်။
သိမ်းဆည်းရမိခဲ့တဲ့ လက်နက်ခဲယမ်းတွေကတော့ ဂျယ်လက်တင်အချောင်း ၁၀၀၊ ဒီတိုနေတာ အချောင်း ၁၀၀၊ AK-47 ကျည်ဆန် ၁၅၀၊ ဘက်ထရီအိုး ၁၀ လုံးနဲ့ ဝါယာကြိုး ၁၀ မီတာတို့ ဖြစ်တယ်လို့ မီဇိုရမ်ရဲတပ်ဖွဲ့က ဖော်ပြထားပါတယ်။
အဆိုပါ သိမ်းဆည်းရမိခဲ့တဲ့ လက်နက်ခဲယမ်းတွေနဲ့ ဖောက်ခွဲရေးပစ္စည်းတွေကို ရှာဟာရဲတပ်ဖွဲ့ကို အမှုဖွင့်အပ်နှံထားပြီး အဲ့ဒီအမှုနဲ့ ပတ်သက်ဆက်နွှယ်သူတွေကို စုံစမ်း ရှာဖွေနေတယ်လို့ မီဇိုရမ်ရဲတပ်ဖွဲ့က ဆိုပါတယ်။
ဓာတ်ပုံ-Mizoram Police
