ကရင်နီ(ကယား)ပြည်နယ်၊ ဖရူဆိုမြို့နယ်အနောက်ခြမ်းရှိ ကျေးရွာတရွာမှာ တိုက်ပွဲ ဖြစ်ပွားခြင်းမရှိဘဲ စစ်ကောင်စီတပ်က လက်နက်ကြီးနဲ့ ပစ်ခတ်မှုကြောင့် အမျိုးသမီးတယောက် ထိခိုက်သွားပြီး စာသင်ကျောင်းနဲ့ အဆောက်အဦတချို့ ပျက်စီးသွားပါတယ်။
အောက်တိုဘာ ၅ ရက် ညနေ ၅ နာရီလောက်က ဖရူမြို့နယ်ရှိ စစ်ကောင်စီရဲ့ အမှတ် ၁၄ တန်းမြင့်စစ်လေ့ကျင့်ရေးကျောင်းကနေပြီး အကြောင်းမဲ့ လက်နက်ကြီးနဲ့ ပစ်ခတ်ခဲ့တာလို့ ကရင်နီအမျိုးသားများကာကွယ်ရေးတပ် (KNDF) က ဒီကနေ့ ထုတ်ပြန်ပါတယ်။
လက်နက်ကြီးနဲ့ ကျေးရွာတွေထဲကို ပစ်ခတ်ခဲ့တဲ့အတွက် အသက် ၅၀ အရွယ် အမျိုးသမီးတယောက် ဦးခေါင်းနဲ့ ကျောမှာ ထိခိုက်ဒဏ်ရာရရှိခဲ့သလို နွားတကောင်လည်း သေဆုံးခဲ့ရကြောင်း ဖော်ပြပါတယ်။
အဆိုပါနေ့ ည ၁၀ နာရီကျော်မှာလည်း စစ်တပ်က လက်နက်ကြီး ၁၀ လုံးလောက်နဲ့ ကျေးရွာဘက်ကို ဦးတည်ပစ်ခတ်ခဲ့တယ်လို့ဆိုပါတယ်။
အောက်တိုဘာ ၄ ရက်ကလည်း အဆိုပါ တန်းမြင့်စစ်လေ့ကျင့်ရေးကျောင်းကနေ တာဝေးပစ် ၁၂၀ မမ လက်နက်ကြီးတွေနဲ့ ပစ်ခတ်ခဲ့လို့ ရွာထဲကို ၅ လုံးကျရောက်ကာ နေအိမ် ၂ လုံး ထိခိုက်ပျက်စီးခဲ့ပါတယ်။
အလားတူ အောက်တိုဘာ ၄ ရက်၊ ည ၁၀ နာရီခွဲလောက်မှာ စစ်ကောင်စီရဲ့ နေပြည်တော်လေတပ်စခန်းနေကနေ ဂျက်တိုက်လေယာဉ် တစီး ဖရူဆိုမြို့အရှေ့ဘက်ခြမ်း တနေရာမှာ ဗုံး ၂ လုံး ကြဲချခဲ့လို့ လူနေအိမ် ၃ လုံး၊ ကျောင်းဆောင် ၃ ဆောင်၊ ဝန်ထမ်းအိမ်ရာ ၁ လုံး၊ ကျောင်းအိမ်သာ ၅ လုံး ပျက်စီးခဲ့တယ်လို့ ကရင်နီလူ့အခွင့်အရေးအဖွဲ့က ထုတ်ပြန်ပါတယ်။
ဒီတိုက်ခိုက်မှုကြောင့် လတ်တလော ကျောင်းပိတ်ထားရပြီး ကျေးရွာသူရွာသားတွေလည်း နေအိမ်မှာ မအိပ်ရဲတော့ဘဲ တောထဲသို့ ပြောင်းရွေ့ ညအိပ်နေကြရပါတယ်။
စက်တင်ဘာလအတွင်း စစ်ကောင်စီတပ်က စစ်ကြောင်းထိုးတာနဲ့ လက်နက်ကြီးနဲ့ ပစ်ခတ်မှုကြောင့် ဖရူဆိုမြို့နယ်ရှေ့ဘက်ခြမ်း ကျေးရွာတချို့နဲ့ စစ်ရှောင် စခန်းအချို့ ထပ်မံပြောင်းရွှေ့နေရသလို ထိတ်လန့်မှုတွေကြောင့် ကိုယ်ဝန်ဆောင်မိခင်နှစ်ယောက် ကလေးအသေ မွေးဖွားခဲ့ကြောင်း ကရင်နီ လူ့အခွင့်အရေးအဖွဲ့က ထုတ်ပြန်ထားပါတယ်။
