တရုတ်နိုင်ငံ၊ ဟန်ကျိုးမြို့မှာ ကျင်းပနေတဲ့ အာရှအားကစား မီတာ ၁၀၀၀ နဂါးလှေလှော်ပြိုင်ပွဲကို အောက်တိုဘာ ၆ ရက် ဒီနေ့မှာ ကျင်းပခဲ့ပြီး မြန်မာအမျိုးသား လှေလှော်အသင်းက ကြေးတံဆိပ်ဆု ရရှိခဲ့ပါတယ်။
နဂါးလှေလှော် မီတာ ၁၀၀၀ ပြိုင်ပွဲကို နိုင်ငံပေါင်း ၁၁ နိုင်ငံမှ ဝင်ရောက်ယှဉ်ပြိုင်ခဲ့ပြီး ပထမလူရွေးပွဲမှာ ၄ မိနစ် ၃၁ ဒသမ ၈ စက္ကန့်နဲ့ ဒုတိယနေရာမှ ပန်းဝင်ခဲ့တာကြောင့် ဗိုလ်လုပွဲ တက်ရောက်နိုင်ခဲ့ပါတယ်။
ဗိုလ်လုပွဲမှာ ၄ မိနစ် ၃၂ ဒသမ ၄၂ စက္ကန့်နဲ့ တတိယနေရာမှ ပန်းဝင်ခဲ့တာကြောင့် ကြေးတံဆိပ်ဆု ရရှိခဲ့ပြီး အင်ဒိုနီးရှားနဲ့ အိမ်ရှင်တရုတ်တို့က ရွှေတံဆိပ်ဆုနဲ့ ငွေတံဆိပ်ဆုတို့ကို ရရှိခဲ့ပါတယ်။
အမျိုးသမီး နဂါးလှေလှော် မီတာ ၁၀၀၀ ပြိုင်ပွဲမှာ မြန်မာအမျိုးသမီးအသင်းက ဗိုလ်လုပွဲ တက်ရောက်နိုင်ခဲ့ပေမဲ့ နောက်ဆုံးမှ ပန်းဝင်ခဲ့တာကြောင့် ဆုတံဆိပ်နဲ့ လွဲချော်ခဲ့ပါတယ်။
အာရှအားကစားပြိုင်ပွဲမှာ မြန်မာအားကစားအဖွဲ့ဟာ လက်ရှိအချိန်ထိ အားကစား ၇ နည်း ဝင်ရောက်ယှဉ်ပြိုင်ပြီး ရွှေတံဆိပ် ၁ ခု၊ ကြေးတံဆိပ် ၂ ခုနဲ့ နိုင်ငံအလိုက် အဆင့် ၂၇ နေရာမှာ ရပ်တည်နေပါတယ်။
