ကချင်လွတ်မြောက်ရေးတပ်မတော် (ကေအိုင်အေ) ဌာနချုပ်ရှိရာ လိုင်ဇာအနီးက နမ်ဆန်ယန်နဲ့ လဂျားယန်ကြား လိုင်လွမ်အောင်ဂျာမှာ အောက်တိုဘာ ၄ ရက်က စစ်ကောင်စီတပ်က ၆ ကြိမ်လောက် ဗုံးကြဲတိုက်ခိုက်ခဲ့တယ်လို့ ဒေသခံတွေနဲ့ ကချင် ရှေ့တန်းသတင်းရင်းမြစ်တွေဆီက သိရပါတယ်။
လိုင်လွမ်အောင်ဂျာ စစ်ကောင်စီတပ်စခန်းကို ကေအိုင်အေ ဘက်က ၄ ကြိမ်လောက် သွားရောက်တိုက်ခိုက်ခဲ့ရာ စစ်ကောင်စီဘက်က ထိခိုက်မှု များလာတာကြောင့် ည ၁၁ နာရီခွဲနဲ့ ၁၂ နာရီဝန်းကျင်ကြားမှာ တံတားဦးဘက်ကနေ ဂျက်ဖိုက်တာနဲ့ ၄ ကြိမ် ဗုံးကြဲ တိုက်ခိုက်ခဲ့တာလို့ ကေအိုင်အေ ရှေ့တန်းသတင်းရင်းမြစ်တဦးက ပြောပါတယ်။
“စစ်ကောင်စီဘက်က အထိများပြီးတော့ တပ်စခန်းစွန့်ခွာရမယ့် အခြေအနေဖြစ်လို့ လေကြောင်းစစ်ကူ ပြန်ခေါ်တာ။ မနေ့ည ၈ နာရီနဲ့ ၁၀ နာရီကြားမှာ စစ်ကောင်စီဘက်က တော်တော်ထိလာလို့ လေကြောင်းစစ်ကူ ခေါ်ခဲ့တာ။”
ည ၁၂ နာရီကျော်၊ ၁ နာရီလောက်ထိ ပစ်ခတ်သံကြားရပြီး ဒီမနက် ၄ နာရီမှာရော၊ ၈ နာရီခန့်ကရော လက်နက်ကြီးပစ်ခတ်သံ ကြားတယ်လို့ ဒေသခံ တယောက်က ပြောပါတယ်။
နောက်ထပ် ရှေ့တန်းသတင်းရင်းမြစ်တဦးကလည်း လိုင်လွမ်အောင်ဂျာနဲ့ ဘွမ်နွယ်တောင် တကြော ညနေ ၄ နာရီ ၅၀ နဲ့ ၅၄ မိနစ်ကြားမှာ မြစ်ကြီးနားက ဂျက်ဖိုက်တာ ၂ စီးနဲ့ ဗုံးကြဲ တိုက်ခိုက်ခဲ့ပြီး ညနေ ၆ နာရီ ၅၀ မိနစ်ကစ လိုင်လွမ်အောင်ဂျာ စစ်ကောင်စီတပ်နဲ့ KIA တို့အကြား တိုက်ပွဲ ပြင်းပြင်းထန်ထန် ဆက်လက်ဖြစ်ပွားခဲ့ကြောင်း ပြောပါတယ်။
ပြီးခဲ့တဲ့ အောက်တိုဘာ ၂ ရက်ကလည်း လိုင်လွမ်အောင်ဂျာဘက် စစ်ကောင်စီတပ်နဲ့ ကေအိုင်အေ တို့အကြား တိုက်ပွဲပြင်းထန်ခဲ့ပြီးနောက် မြစ်ကြီးနားက တိုက်လေယာဉ် ၃ စီးနဲ့ မနက် ၈ နာရီ ၄၀ မိနစ်မှာ တကြိမ်၊ မနက် ၉ နာရီ ၉ မိနစ်မှာ တကြိမ်၊ မနက် ၉ နာရီ ၁၄ မိနစ်မှာ တကြိမ် ဗုံးကြဲတိုက်ခိုက်ခဲ့တာ ရှိတယ်လို့ ဆိုပါတယ်။
ဒါ့အပြင် အဲဒီ အောက်တိုဘာ ၂ ရက် မနက် ၇ နာရီခွဲခန့်ကလည်း ဗန်းမော်မြို့သစ်အနီး နွမ်းလန့်ရွာအထက်က ပန်ဆတ်အနီး စစ်ကြောင်းထိုး လှုပ်ရှားလာတဲ့ စစ်ကောင်စီ ခမရ - ၄၃၈ တပ်ဖွဲ့နဲ့ ကေအိုင်အေ တပ်မဟာ ၅၊ တပ်ရင်း ၂၅ တို့ ထိတွေ့တိုက်ပွဲ ဖြစ်ပွားခဲ့သေးတယ်လို့ ဆိုပါတယ်။
