ချင်းပြည်နယ်၊ မင်းတပ်မြို့အခြေစိုက် Chin Defence Force-Mindat (CDF-မင်းတပ်) အတွက် လက်နက်ခဲယမ်းတွေ တပ်ဆင်ပေးခဲ့တယ်လို့ IMCO အဖွဲ့ဆီက သိရပါတယ်။

International Mindat K’Cho Organization (IMCO)၊ Heal the World၊ CEA (Norway) အဖွဲ့ ၃ ဖွဲ့ ပူးပေါင်းဝယ်ယူခဲ့တဲ့ AK-47 သေနတ် ၄၀ လက်၊ ကျည် ၁၂၀,၀၀၀ တောင့်၊ ကျည်အိမ် ၁၂၀ ခုတို့ကို CDF-မင်းတပ်ထံ အပ်နှံခဲ့တယ်လို့ အောက်တိုဘာ ၂ ရက်မှာ သတင်းထုတ်ပြန်ပါတယ်။

IMCO အဖွဲ့အနေနဲ့ CDF-မင်းတပ်အတွက် လက်နက်ဝယ်ယူတပ်ဆင်ပေးမယ့် ပရောဂျက်ကို ၂၀၂၂ ခုနှစ် ဇွန်လကတည်းက စတင်ခဲ့တာ ဖြစ်ပါတယ်။

ပရောဂျက်အတွက် ကံစမ်းမဲလက်မှတ်တွေ ရောင်းချခဲ့ပြီး ၇၀၀၇၂ ဒသမ ၇၁ ဒေါ်လာ ရရှိခဲ့ပေမဲ့ ကာကွယ်ရေးတပ်ဖွဲ့တွေအတွက် အရေးပေါ် စားနပ်ရိက္ခာ လိုအပ်ချက်တွေကို ဖြည့်ဆည်းခဲ့ရတဲ့အတွက် ၅၈၇၄၉ ဒသမ ၄ ဒေါ်လာ လက်ကျန်ရှိခဲ့တယ်လို့ သိရပါတယ်။

IMCO အဖွဲ့ရဲ့ ပရောဂျက်ငွေရယ်၊ Heal the World အဖွဲ့နဲ့ CEA(Norway) အဖွဲ့ရဲ့ ပူးပေါင်းငွေ ဒေါ်လာ ၃၅,၀၀၀ လောက်နဲ့ CDF-မင်းတပ်ကို လက်နက်တပ်ဆင်ပေးခဲ့တယ်လို့ သိရပါတယ်။

IMCO ပြန်ကြားရေးတာဝန်ခံက “ဒီ IMCO ရဲ့ CDF- Mindat ကို လက်နက်တပ်ဆင်ပေးတဲ့ ပရောဂျက်မှာ ပါဝင်ကူညီပေးခဲ့တဲ့ အဖွဲ့အစည်း၊ လူပုဂ္ဂိုလ်များ၊ လစဉ်ကောက်ခံငွေများ ထည့်ဝင်သူများ၊ မဲလက်မှတ်များ အားပေးဝယ်ယူခဲ့သူများနဲ့ Heal the world အဖွဲ့နဲ့ CEA(Norway) တို့ကို ကျေးဇူးတင်ရှိပါတယ်” လို့ ပြောပါတယ်။

CDF-Mindat ဟာ စစ်အာဏာရှင်ကို အစောဆုံး တော်လှန်တိုက်ခိုက်ခဲ့ပြီး ဒီနေ့အထိ စစ်ကောင်စီတပ်ဖွဲ့ စစ်‌ကြောင်းများစွာကို မင်းတပ်မြို့နယ်၊ ကန်ပက်လက်မြို့နယ်၊ ယောဒေသတွေက မဟာမိတ်တွေနဲ့ ပူးပေါင်းပြီး တိုက်ခိုက်ချေမှုန်းနေတဲ့ တော်လှန်ရေးတပ်ဖွဲ့တခု ဖြစ်ပါတယ်။