ပဲခူးတိုင်းအနောက်ခြမ်း၊ ပြည်မြို့နယ်၊ အမျိုးသားဒီမိုကရေစီအဖွဲ့ချုပ် (NLD) ပါတီရဲ့ တိုင်းဒေသကြီး လွှတ်တော်ကိုယ်စားလှယ် ဦးကျော်ဇေယျကို ပြည်အကျဉ်းထောင်တွင်း အထူးတရားရုံးက နှစ်ရှည်ထောင်ဒဏ် အနှစ် ၂၀  ထပ်မံချမှတ်ခဲ့တယ်လို့  တရားရေးနဲ့ နီးစပ်သူတွေထံက သိရပါတယ်။

စက်တင်ဘာ ၂၂ ရက်က ထောင်တွင်းတရားရုံးက ပြည်မြို့နယ်နဲ့ တောင်ငူမြို့နယ်အတွင်းက အမှု ၂ ခုနဲ့ ထောင်ဒဏ် နှစ် ၂၀ ချမှတ်ခဲ့တာလို့ ဆိုပါတယ်။

တရားရေးနဲ့နီးစပ်သူတဦးက “မြို့နယ်အမှု ၂ မှုနဲ့ နှစ် ၂၀ ချလိုက်တာ။ အရင်အမှုက ၁၉ နှစ်ချထားတယ်။ အကုန်လုံး မြို့နယ်အမှုတွေပါပဲ။ ကျန်းမာရေးတော့ သိပ်မကောင်းဘူး။ ကိုဗစ်ရောဂါလည်း ဖြစ်နေတယ်။ အရင်တည်းက ဆေးပုံမှန်သောက်ပြီး ရောဂါကုနေရတာ။ ဆေးဝါးကုသမှု ကောင်းကောင်းရဖို့လိုတယ်” လို့ ဒီဗွီဘီကို ပြောပါတယ်။

၂၀၂၂ ခုနှစ် ဇွန်လ ၉ ရက်‌နေ့မှာ  ဦးကျော်ဇေယျနဲ့အတူ အပေါင်းအသင်းတချို့ လှိုင်သာယာမြို့နယ်မှာ  ဖမ်းဆီးခံခဲ့ရပြီး ရေကြည်အိုင် စစ်ကြောရေးနဲ့ ပြည်ဒေသကွပ်ကဲရေး စစ်ကြောရေးစခန်းမှာ စစ်ဆေးခံရပြီး ပြည်အကျဉ်းထောင်မှာ ပုဒ်မ ၆ ခုနဲ့ တရားစွဲဆို ထောင်ချထားတာလို့ သိရပါတယ်။

မနှစ် ဒီဇင်ဘာ ၁၂ ရက်က ပြည်ထောင်တွင်းတရားရုံးက ဦးကျော်ဇေယျကို ပုဒ်မ ၅၀၅(က) ၂ မှု၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေပုဒ်မ ၂၅၊ ရာဇသတ်ကြီးဥပဒေပုဒ်မ ၁၃၀(က)၊ ယစ်မျိုးအက်ဥပဒေ၊ အကြမ်းဖက်ပုဒ်မတွေနဲ့ ထောင် ၁၉ နှစ် အမိန့်ချမှတ်ခဲ့ပါတယ်။ 

Photo - Cj