ထိုင်းနိုင်ငံ၊ ဘန်ကောက်မြို့လယ်ရှိ စျေးဝယ်စင်တာတခုကို ထိုင်းရဲတပ်ဖွဲ့က ဝင်ရောက်စီးနင်းပြီး တရားမဝင် ဈေးရောင်းတဲ့အလုပ် လုပ်ကိုင်နေတဲ့ မြန်မာနိုင်ငံသား ၁၈ ဦး ဖမ်းဆီးခဲ့တယ်လို့ CH3 Plus ထိုင်းသတင်းမှာ ဖော်ပြပါတယ်။
ဘန်ကောက်မြို့ နန်းမူလမ်း ပထူဝမ်ဒေသမှာရှိတဲ့ စျေးဝယ်စင်တာတခုရဲ့ မြန်မာနိုင်ငံသားတွေ လုပ်ကိုင်နေတဲ့ ဒုတိယထပ်ရှိ ဆိုင်ခန်း ၁ ခန်း၊ တတိယထပ်ရှိ ဆိုင်ခန်း ၅ ခန်းနဲ့ စတုတ္ထထပ်ရှိ ဆိုင်ခန်း ၄ ခန်း ကို ထိုင်းရဲတပ်ဖွဲ့က ဝင်စစ်ဆေးခဲ့ပြီး မြန်မာနိုင်ငံသားတွေကို ဖမ်းဆီးခဲ့ပါတယ်။
အဖမ်းခံရတဲ့ မြန်မာနိုင်ငံသားတွေ လုပ်ကိုင်နေတဲ့ ဆိုင်အများစုဟာ အိတ်၊ အဝတ်အထည်၊ ဖိနပ်၊ ဖုန်းအိတ်တွေ ရောင်းချကြတဲ့ဆိုင်တွေဖြစ်ပြီး ရဲတပ်ဖွဲ့က ဝင်ရောက် စစ်ဆေးတဲ့အခါ မီးပိတ်ပြီး ဆိုင်တံခါးပိတ်ဖို့ ကြိုးစားခဲ့သလို ထွက်ပြေးဖို့ ကြိုးစားခဲ့ကြသူတချို့ လွတ်မြောက်သွားပါတယ်။
အလုပ်သမားဝန်ကြီးဌာနက ဧပြီ ၁ ရက်နေ့မှာ ထုတ်ပြန်ခဲ့တဲ့ နိုင်ငံခြားသားမျး လုပ်ပိုင်ခွင့်အရ စင်တာတွေမှာ အလုပ်လုပ်တဲ့အလုပ်သမားတွေဟာ ပြဿနာမရှိပေမဲ့ ကိုယ်ပိုင်ဆိုင်ဖွင့်ပါက အစိုးရခွင့်ပြုချက် အပါအဝင် အချက် ၄ ချက်နဲ့ ကိုက်ညီမှ ဖွင့်လို့ရမှာဖြစ်ပြီး အချက်အလက် မပြည့်စုံပါက အရေးယူခံရနိုင်ပါတယ်လို့ ပြောထားပါတယ်။
ဖမ်းဆီးခံရတဲ့ မြန်မာနိုင်ငံသား ၁၈ ဦးကို ဘယ်လိုအရေးယူထားတယ်ဆိုတာ သတင်းမှာ မဖော်ပြခဲ့ပေမဲ့ ပြစ်မှုထင်ရှားပါက ပုဒ်မ ၈ အရ ဒဏ်ငွေ ဘတ် ၅၀၀၀ မှ ၅၀၀၀၀ အထိပေးဆောင်ရနိုင်ပြီး သက်ဆိုင်ရာနိုင်ငံသို့ ပြန်လည်ပို့ဆောင်နိုင်တယ်လို့ ပြောထားပါတယ်။
လုပ်ငန်းရှင်တွေအနေနဲ့လည်း ပြစ်မှုထင်ရှားပါက ပုဒ်မ ၉ အရ ဘတ်ငွေ ၁၀၀၀၀ မှ ဘတ် ၁၀၀၀၀၀ အထိဒဏ်ငွေဆောင်ရမှာဖြစ်ပြီး နောက်တကြိမ်ကျူးလွန်ပါက ဘတ် ၅၀၀၀၀ မှ ဘတ် ၂၀၀၀၀၀ အထိပေးဆောင်ရမယ့်အပြင် အလုပ်လုပ်ခွင့်လည်း ၃ နှစ်ပိတ်ပင်ခံရမှာ ဖြစ်ပါတယ်။
Source/Photo. CH3 Plus New
