ယူ-၂၃ အာရှဖလားခြေစစ်ပွဲ အုပ်စုနောက်ဆုံးပွဲစဥ်အဖြစ် မြန်မာယူ-၂၃ အသင်းနဲ့ အိမ်ရှင် တောင်ကိုရီးယား ယူ-၂၃ အသင်းတို့ စက်တင်ဘာ ၁၂ ရက်က ယှဥ်ပြိုင်ကစားခဲ့ရာ တောင်ကိုရီးယား ယူ-၂၃ အသင်းက ၃ ဂိုး ဂိုးမရှိနဲ့ အနိုင်ရသွားပါတယ်။
အာရှအင်အားကြီးအသင်းဖြစ်တဲ့ တောင်ကိုရီးယားအသင်းဟာ မြန်မာအသင်းကို ဂိုးပေါက်တည့်ကန်သွင်းမှု တကြိမ်မှမပေးရတဲ့အထိ ပွဲစတည်းက တဖက်သတ် ဖိကစားထားခဲ့ပြီး ပထမပိုင်းမှာ ၁ ဂိုး၊ ဒုတိယပိုင်းမှာ ၂ ဂိုး သွင်းယူခဲ့ပြီး ဂိုးပြတ် အနိုင်ရရှိခဲ့တာပါ။
တောင်ကိုရီးယား ယူ-၂၃ အသင်းဟာ မြန်မာအသင်းကို အနိုင်ယူပြီးနောက် ကာတာနိုင်ငံမှာ ကျင်းပမယ့် ၂၀၂၄ ယူ-၂၃ အာရှဖလားပြိုင်ပွဲကို ဝင်ရောက်ယှဥ်ပြိုင်ခွင့် ရမှာဖြစ်ပြီး မြန်မာယူ-၂၃အသင်းကတော့ ခြေစစ်ပွဲအဆင့်မှာပဲ ကျေနပ်ခဲ့ရပါတယ်။
အုပ်စုအတွင်း တခြားပွဲစဥ်တွေဖြစ်တဲ့ ကာတာ ယူ-၂၃ နဲ့ ကာဂျစ္စတန် ယူ-၂၃ တို့ပွဲစဥ်မှာ ကာတာ ယူ-၂၃ အသင်းက ၁ ဂိုး ဂိုးမရှိနဲ့ အနိုင်ရရှိခဲ့ပါတယ်။
အုပ်စု ခ မှာ ကာတာအသင်းက ရမှတ် ၉ မှတ်နဲ့ အုပ်စုပထမ၊ တောင်ကိုရီးယားအသင်းက ရမှတ် ၆ မှတ်နဲ့ အုပ်စုဒုတိယ၊ ကာဂျစ္စတန်က ရမှတ် ၁ မှတ် ဂိုးကွာခြားချက်အသာနဲ့ အုပ်စုတတိယ၊ မြန်မာအသင်းက ရမှတ် ၁ မှတ်နဲ့ အုပ်စုနောက်ဆုံးနေရာမှာ ရပ်တည်နေပါတယ်။
ကာတာအသင်းဟာ ၂၀၂၄ ယူ-၂၃ အာရှဖလားပြိုင်ပွဲ အိမ်ရှင်ဖြစ်တာကြောင့် အခုပြိုင်ပွဲကို ခြေစမ်းပွဲသဘောအနေနဲ့သာ ဝင်ရောက်ယှဥ်ပြိုင်တာဖြစ်တဲ့အတွက် ရလဒ်ကို ထည့်သွင်း တွက်ချက်တာ မရှိပါဘူး။
Photo-MFF
