ကရင်အမျိုးသားအစည်းအရုံး (KNU) ဖာပွန်(မူတြော်)ခရိုင်မှာ စစ်ကောင်စီရဲ့ ခေးပူတပ်စခန်း တိုက်ခိုက်သိမ်းပိုက်ခံရပြီးနောက် လေကြောင်းကနေ တိုက်ခိုက်လာတာကြောင့် ကျောင်းသား ကျောင်းသူ ၃ ဦးနဲ့ ကျောင်းကော်မတီ ၁ ဦးသေဆုံးခဲ့ပြီး ၆ ဦး ဒဏ်ရာရခဲ့တယ်လို့ တပ်မဟာ ၅ (ပြောခွင့်ရ) ဗိုလ်မှူးကြီး စောကလယ်ဒိုက ဒီဗွီဘီကို ပြောပါတယ်။

စခန်းသိမ်းတိုက်ပွဲအပြီး စက်တင်ဘာ ၇ ရက်နေ့ မနက် ၆ နာရီလောက်က ဒွယ်လိုးမြို့နယ် ထီးကောထာရွာကို စစ်ကောင်စီတပ်ဘက်က လေကြောင်းကနေ ဗုံးကြဲတိုက်ခိုက်ခဲ့ရာ ကျောင်းသူကျောင်းသား ၃ ဦးနဲ့ ကျောင်းကော်မတီ ထိခိုက်သေဆုံးခဲ့ပြီး ကျောင်းသား ကျောင်းသူ ၅ ဦးနဲ့ ကျောင်းဆရာမ ၁ ဦး ထိခိုက်ဒဏ်ရာရရှိခဲ့တာပါ။

ဒါအပြင် လူသောမြို့နယ်၊ သေသူးခီးကျေးရွာကိုပါ ဗုံးကြဲတိုက်ခိုက်ခဲ့ရာ အပြစ်မဲ့ပြည်သူ ၁ ဦး ထိခိုက်ဒဏ်ရာရရှိပြီး နေအိမ် ၄ လုံး၊ ဘုရာရှစ်ခိုးကျောင်း ၁ ကျောင်း ၊ စာသင်ကျောင်း ၁ ကျောင်း ထိမှန်ပျက်စီးခဲ့ရတဲ့အပြင် ထပ်မံပြီး ကောရဘောထာကျေးရွာကိုပါ ဗုံးကြဲတိုက်ခိုက်ခဲ့ရာ ဒေသခံတွေက တိမ်းရှောင်နေတဲ့အတွက် ထိခိုက်သူမရှိခဲ့ပေမဲ့ နေအိမ် ၄ လုံး၊ စားသင်ကျောင်း ၁ ကျောင်း၊ ဘုရားရှစ်ခိုးကျောင်း ၁ ကျောင်း၊ ဝတ်ပြုဆုတောင်းဆောင် ၁ ခု ထိမှန်ပျက်စီးခဲ့ပါတယ်။

အလးတူ အဲဒီနေ့ တရက်တည်း ညနေ ၆ နာရီလောက်က လူသောမြို့နယ် သေခေးကျေးရွာအုပ်စု သူခေးထရွာကို ဗုံးကြဲပစ်ခတ်ခဲ့ရာ ကျေးရွာအပေါ် ကျရောက်တာမရှိတဲ့အတွက် ထိခိုက်ပျက်စီးဆုံးရှုံးတာ မရှိခဲ့ဘူးလို့ ဒေသခံတွေက ပြောတယ်။

စက်တင်ဘာ ၈ ရက်ကလည်း လူသောမြို့နယ် ခေးပူကျေးရွာအုပ်စုအတွင်းက ဒေဘူးနိုကျေးရွာကို ထပ်မံဗုံးကြဲတိုက်ခိုက်ခဲ့ရာ ဒေသခံတွေက တိမ်းရှောင်နေတဲ့အတွက် ထိခိုက်သူမရှိခဲ့ပါဘူး။

စစ်ကောင်စီက လေကြောင်းကနေ ဗုံးကြဲတိုက်ခိုက်တာတွေကြောင့် ဒေသခံ ရွာသားတွေ ရွာထဲမှာမနေရဘဲ တောတောင်တွေထဲမှာ တိမ်းရှောင်နေရပြီး မိုးတွင်းကာလဖြစ်တာကြောင့် အခက်အခဲ အများကြီး ရင်ဆိုင်ရတယ်လို့ တပ်မဟာ၅ (ပြောခွင့်ရ)ဗိုလ်မှူးကြီး စောကလယ်ဒိုက ပြောပါတယ်။

“အထူးသဖြင့် ထီးဂေါ်ထာကျေးရွာက KNLA အဖွဲ့အစည်း ရုံးစိုက်ရာမဟုတ်တဲ့အပြင် မနီးတော့ ပုန်းရှောင်ဖို့ မလိုအပ်ဘူးထင်ပြီး တောထဲမှာပြင်ဆင်ထားတာမရှိတဲ့အတွက် အခုလို လေယာဉ်လာပစ်တဲ့အချိန် ဒေသခံတွေက ကြောက်လန့်ပြီး ထွက်ပြေးနေရတော့ နေထိုင်စားသောက်ရေးနဲ့ ဆေးဝါးအခက်အခဲတွေနဲ့ ရင်ဆိုင်နေရတယ်။”

စက်တင်ဘာ ၆ ရက်နေ့ မနက် ၅ နာရီခွဲလောက်က တပ်မဟာ ၅ လက်အောက်ခံ KNLA ပူးပေါင်းတပ်ဖွဲ့တွေက စစ်ကောင်စီရဲ့ခေးပူတပ်စခန်းကို တိုက်ခိုက်သိမ်းပိုက်ခဲ့ရာ အရာရှိ ၃ ယောက်သေဆုံးပြီး ထိခိုက်ဒဏ်ရာရရှိသူ များပြားခဲ့တဲ့အပြင် လက်နက်ခဲယမ်းတွေကိုပါ သိမ်းဆည်းရမိခဲ့ပါတယ်။

သိမ်းဆည်းရမိခဲ့တဲ့အထဲမှာ အရာရှိကိုင်ဆောင်တဲ့ လက်နက် ၃ လက်ပါဝင်ပြီး စစ်ကောင်စီတပ်ဘက်က သေဆုံးထိခိုက်သူမှုကိုတော့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။