ဧရာဝတီတိုင်း၊ ဇလွန်မြို့၊ ဆန်တန်းရပ်ကွက်၊ ဖောင်တော်ချိတ်စေတီအနီး ကမ်းနားမှာ စက်တင်ဘာ ၈ ရက် မနက်ပိုင်းက ကလေး ၄ ယောက် ရေနစ်သေဆုံးသွားတယ်လို့ မြို့ခံကယ်ဆယ်ရေးအသင်း တာဝန်ရှိသူတွေက ပြောပါတယ်။
အသက် ၅ နှစ်၊ ၇ နှစ်၊ ၁၀ နှစ်အရွယ် ယောင်္ကျားလေး ၃ ယောက်နဲ့ အသက် ၁၃ နှစ် အရွယ်မိန်းကလေး ၁ ယောက် ဖြစ်တယ်လို့ သိရပြီး အဲဒီနေ့ မနက်ပိုင်းက ဆန်တန်းရပ်ကွက်က ဘုန်းကြီးကျောင်း ဥပုသ်နေ့အလှူကို လာကြပြီးအပြန်မှာ ရေနစ်သေဆုံးခဲ့တာ ဖြစ်ပါတယ်။
မနက် ၈ နာရီခွဲလောက်မှာ ယောင်္ကျားလေး ၃ ယောက်ဟာ ကမ်းနားအစပ်မှာ ရေဆင်းကူးရင်း ရေနစ်နေခဲ့တာကြောင့် အစ်မဖြစ်သူ ၁၃ နှစ် မိန်းကလေးက ဆင်းကယ်ခဲ့ပြီး သူပါ ရေထဲနစ်မြုပ်သွားတာ ဖြစ်ပါတယ်။
အနှိုင်းမဲ့အလင်း ကယ်ဆယ်ရေးအသင်းတာဝန်ရှိသူက “ဥပုသ်နေ့ကို ဘုန်းကြီးကျောင်းမှာ မုန့်ဟင်းခါးလာစားကြရင်း အပြန်မှာ ဖြစ်တာ။ ယောင်္ကျားလေး ၃ ဦးက ရေဆင်းချိုးရင်း နစ်နေတော့ အစ်မဖြစ်သူက ဆင်းကယ်တာ။ သူပါ နစ်သွားတာ။ ကယ်ဆယ်ရေးအဖွဲ့တွေ ရောက်တော့ ကလေးတွေက ရေထဲနစ်သွားပါပြီ။ ရေတက်နေတော့ ရေစီးသန်တာလည်း ပါတယ်။ မနေ့က ၁၃ နှစ် မိန်းကလေးနဲ့ ၁၀ နှစ်ကောင်လေး ရုပ်အလောင်းကို ဆယ်လို့ ရခဲ့ပါတယ်” လို့ ပြောပါတယ်။
ကယ်ဆယ်ရေးအဖွဲ့တွေဟာ မနက် ၉ နာရီ ၄၅ မိနစ်လောက်မှာ မိန်းကလေးငယ် ရုပ်အလောင်းနဲ့ မွန်းလွဲ ၂ နာရီ ၅၁ မိနစ်လောက်မှာ ၁၀ နှစ်အရွယ် ယောင်္ကျားလေး ရုပ်အလောင်းတွေကိုပဲ ဆယ်ယူရရှိခဲ့တာဖြစ်ပြီး ကျန်ကလေး ၂ ယောက်ကိုတော့ ရှာမတွေ့သေးပါဘူး။
ရှာတွေ့ထားတဲ့ ကလေး ၂ ယောက် ရုပ်အလောင်းကို ဗြဟ္မစိုရ်အသင်းယာဉ်နဲ့ ဇလွန်ဆေးရုံရင်ခွဲဌာနကို ပို့ဆောင်ပေးထားတယ်လို့ သိရပြီး မြစ်ရေတက်နေချိန်မှာ ကလေးတွေကို ရေဆင်းကူးတာ၊ ရေထဲဆင်းဆော့တာမျိုး မပြုလုပ်စေဖို့ အရပ်ဘက်အသင်းတွေက သတိပေးထားပါတယ်။
