မကွေးတိုင်း၊ မြိုင်မြို့နယ်မှာ စက်တင်ဘာ ၇ ရက် မနက်ပိုင်းက စစ်ကောင်စီတပ် ရိက္ခာပို့ကားတွေ ဗုံးကြဲတိုက်ခိုက်ခံရပြီး ထိခိုက်သေဆုံးသူ များပြားခဲ့တယ်လို့ မြိုင်မြို့နယ် ပကဖကနေ သိရပါတယ်။

မြိုင်မြို့နယ် ကန်နီကျေးရွာမှာ တပ်စွဲထားတဲ့ စစ်ကောင်စီတပ်သားတွေနဲ့ ပျူစောထီးတွေကို စက်တင်ဘာ ၇ ရက် မနက် ၉ နာရီလောက်မှာ မောင်းသူမဲ့လေယာဥ်တွေနဲ့ ဗုံးသီး ၅ လုံး ဖြုတ်ချပြီး တိုက်ခိုက်ခဲ့တယ်လို့ မြိုင်မြို့နယ် ပကဖ ပြန်ကြားရေးတာဝန်ခံ ကိုသုခက ဒီဗွီဘီကို ပြောပါတယ်။

ဒါ့အပြင် ကန်နီကျေးရွာကို ရိက္ခာလာပို့တဲ့ စစ်ကောင်စီကားတွေကိုလည်း မနက် ၁၀ နာရီလောက်က ကျောင်းကုန်းကျေးရွာခေါင်းရင်း ကားတွေရပ်ထားတဲ့နေရာတွေကို ဒရုန်းတွေနဲ့ မနားတမ်း ဗုံးကြဲတိုက်ခိုက်ခဲ့တယ်လို့ ဆိုပါတယ်။

ကန်နီကျေးရွာကို ညနေ ၅ နာရီခွဲလောက်မှာလည်း မောင်းသူမဲ့ လေယာဥ်ငယ်တွေနဲ့ ဗုံး ၅ လုံးကြဲပြီး ထပ်မံတိုက်ခိုက်ခဲ့ကာ အဲဒီတိုက်ခိုက်မှုတွေအတွင်းမှာ စစ်ကောင်စီ ရိက္ခာကားတွေပေါ် ဗုံးသီးတွေ တည့်တည့်ကျရောက်ပေါက်ကွဲပြီး အများအပြား ထိခိုက်သေဆုံးခဲ့တယ်လို့ ပြောပါတယ်။

အဲဒီတိုက်ခိုက်မှုကို မြိုင်ပကဖရဲ့ ဒရုန်းတပ်ဖွဲ့ဖြစ်တဲ့ Myaing U.A.V Fighter အဖွဲ့၊ မြိုင်ပကဖ တပ်ရင်း-၂၊ တပ်ခွဲ-၂၊ DMG အဖွဲ့၊ ဒေါင်းနီအဖွဲ့၊ မဟူရာအလင်းတန်းအဖွဲ့၊ MPL တိုက်နယ် ၄ ပကဖအဖွဲ့နဲ့ ဗိုလ်လင်းမြွေအဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး ရဲဘော်တွေ ထိခိုက်မှုမရှိခဲ့ဘူးလို့ ဆိုပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။