မကွေးတိုင်း၊ မြိုင်မြို့အဝင်က စစ်ကောင်စီတပ် မန်းလေးဂိတ်ကို စက်တင်ဘာ ၄ ရက် မနက် ၈ နာရီ ၄၅ မိနစ်လောက်က ကားနဲ့ အနီးကပ် ဝင်ရောက်ပစ်ခတ်ခဲ့ရာ တဦးသေဆုံးပြီး တဦး ဒဏ်ရာရရှိသွားတယ်လို့ မြိုင်မြို့နယ် ပြည်သူ့ကာကွယ်ရေးတပ်ဖွဲ့ထံက သိရပါတယ်။
မြိုင် ပကဖမှ ဗိုလ်ကျောက်တိုင်က “ဒီနေ့ မနက်ကပေါ့၊ ၈ နာရီ ၉ နာရီလောက်ကပါ။ ကားနဲ့ သွားရောက်ပစ်ခတ်ခဲ့တာပါ။ ကားကို သဲအိတ်တွေနဲ့ သေချာပြင်ဆင်ပြီး အလစ်ကို ဝင်ရောက်ပစ်ခတ် တိုက်ခိုက်နိုင်ခဲ့တာဗျ။ ဂိတ်ရှေ့မှာရှိနေတဲ့ စခ ၂ ကောင်ထဲမှာ တကောင်ကတော့ သေချာပေါက်သေတယ်၊ နောက်တယောက်လည်း လဲကျသွားတာပဲ၊ မျက်မြင်ပေါ့နော်။ ပစ်ခတ်ချိန်က ခဏပါပဲ။ မကြာပါဘူး။ ကျနော်တို့ဘက်က အထိအခိုက် မရှိပါဘူးဗျ။ ကျနော်တို့ကတော့ ဒီ အာဏာရှင် ကျဆုံးတဲ့အထိ ဆက်လက်တိုက်ပွဲဝင်နေမှာပါ” လို့ ဒီဗွီဘီကို ပြောပါတယ်။
အပြန်အလှန်ပစ်ခတ်ချိန် အနည်းငယ်မျှသာ ကြာမြင့်ပြီး ဘန်ကာရှေ့မှာထွက်နေတဲ့ စစ်ကောင်စီတပ်ဖွဲ့ဝင် ၂ ယောက်မှာ တယောက်သေပြီး တယောက် ဒဏ်ရာရကြောင်း၊ အဆိုပါ သေဆုံး၊ ဒဏ်ရာရသူတွေကို အိမ်စီးကားနဲ့ လာရောက် သယ်ဆောင်သွားကြောင်း သိရပြီး မြိုင် ပကဖဘက်က အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။
အဆိုပါ စစ်ဆင်ရေးကို မြိုင် ပြည်သူ့ကာကွယ်ရေးတပ်ဖွဲ့ (ပ.က.ဖ) တပ်ရင်း-၂ တပ်ခွဲ ၃၊ တပ်ခွဲ ၄ နဲ့ Earthquake People`s Defence Force တို့က တိုက်ခိုက်ခဲ့တာလို့ မြိုင် ပကဖထံက သိရပါတယ်။
အလားတူ မြိုင်မြို့နယ်မှာပဲ စက်တင်ဘာ ၃ ရက် ညနေပိုင်းက စစ်ကောင်စီကားတစီး တိုက်ခိုက်ခံရပြီး ထိခိုက်သေဆုံးသူ ရှိနိုင်တယ်လို့ အနောက်လွင်ပြင်-LPDF ကနေ သိရပါတယ်။
မြိုင်မြို့နယ် စက်မှု ၂ က စစ်ကောင်စီတပ်သား အင်အား ၃၀ လောက်ဟာ ကိုင်းတောမရွာနားကနေ စက်မှု ၂ ထဲဲကို ရေပေးပို့နေတဲ့ ရေစက်က စစ်ကောင်စီ တပ်သားတွေနဲ့ တာဝန်ချိန်းပြီး ကားနဲ့ပြန်လာချိန် စက်တင်ဘာ ၃ ရက် ညနေ ၄ နာရီ မိနစ် ၅၀ မှာ ပြည်သူ့ကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့ကြတာလို့ အနောက်လွင်ပြင်-LPDF တာဝန်ခံ ရဲဘော်တေဇက ဒီဗွီဘီကို ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က သေဆုံး၊ ဒဏ်ရာရသူ ရှိနိုင်ပြီး အတိအကျ သိရှိနိုင်အောင် ဆက်လက်စုံစမ်းနေတယ်လို့ ဆိုပါတယ်။
“အဲဒီတိုက်ခိုက်မှုကို ကျနော်တို့ အနောက်လွင်ပြင်-LPDF၊ MUGDF၊ ဝံပုလွေပြောက်ကျားတပ်ဖွဲ့နဲ့ Cobra ပြောက်ကျားတပ်ဖွဲ့ (မြိုင်) တို့ ပူးပေါင်းတိုက်ခိုက်ခဲ့တာ ဖြစ်ပြီး ကျနော်တို့ဘက်က ရဲဘော်တွေ ထိခိုက်မှုမရှိခဲ့ဘူး။”
မြိုင်မြို့နယ်မှာ သြဂုတ် ၁ ရက်နဲ့ ၂ ရက်နေ့တွေကလည်း စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၅ ယောက်ထက်မနည်း ဒဏ်ရာရရှိခဲ့တယ်လို့ မြိုင်မြို့နယ် ပကဖကနေ သိရပါတယ်။
အဲဒီတိုက်ခိုက်မှုတွေအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
