ရခိုင်ပြည်နယ်၊ ကျောက်တော်မြို့နယ်၊ ညောင်ချောင်းစစ်ဘေးရှောင်စခန်းက စစ်ရှောင်တွေရဲ့ တဲအိမ်တွေဟာ ယိုင်နဲ့နေတာကြောင့် နေထိုင်ရေး အခက်အခဲကြုံနေကြတယ်လို့ စစ်ရှောင်နဲ့ နီးစပ်သူတွေက ပြောပါတယ်။
ညောင်ချောင်းစစ်ဘေးရှောင်စခန်းမှာ အိမ်ထောင်စု ၆၉၂ စုရှိပြီး တဲအိမ်ပေါင်း ၆၉၂ အိမ်ရှိပါတယ်။
စစ်ဘေးရှောင်တွေရဲ့ တဲအိမ်တွေဟာ ဆောက်လုပ်ထားတာ ၃ နှစ်ကျော်ကြာပြီ ဖြစ်တဲ့အပြင် မိုခါမုန်တိုင်းဒဏ်ခံခဲ့ရတဲ့အတွက် တဲအိမ်တွေ ယိုင်နဲ့ကုန်တာပါ။
စစ်ရှောင်စခန်းတာဝန်ခံက “စပြီးဆောက်တဲ့အချိန်ကနေ အခုထိ ပြုပြင်လိုက် နေလိုက်လုပ်လာတာပေါ့။ အခုက မိုခါလည်းထိသွားတော့ တဲတွေက လုံးဝယိုင်နဲ့ကုန်တာပါ။ UNHCR က စာကျထားပြီးပါပြီ၊ မကြာခင် ပြန်ဆောက်ကြတော့မှာပါ” လို့ ပြောပါတယ်။
စစ်ဘေးရှောင်တွေဟာ စစ်ရှောင်ကာလ ၃ နှစ်ကျော်ကြာမြင့်ပြီး အလှူရှင်တွေကိုသာ အားကိုးနေရတဲ့အတွက် စားဝတ်နေရေး အခက်အခဲကြုံတွေ့နေရပါတယ်။
စစ်ရှောင်တွေဟာ ၂၀၂၀ ခုနှစ် မတ်လကတည်းက ချင်းပြည်နယ် ပလက်ဝမြို့နယ်နဲ့ ရခိုင်ပြည်နယ် ကျောက်တော်မြို့အကြားမှာ ရခိုင့်တပ်တော် (AA) နဲ့ မြန်မာစစ်တပ်တို့ရဲ့ တိုက်ပွဲတွေကြောင့် ကျောက်တော်မြို့နယ် ညောင်ချောင်းကျေးရွာဘက်ကို ရွှေ့ပြောင်းလာကြရတာဖြစ်ပါတယ်။
