ချဲလ်ဆီးတောင်ပံတိုက်စစ်မှူး မိုင်ခေလိုမူဒရစ်ရဲ့ ကားမီးပွိုင့်မိနေချိန်မှာ အာဆင်နယ်အသင်းဆီသာ ပြောင်းရွှေ့လာသင့်ကြောင်း ပရိသတ်တွေက ဝိုင်းဝန်း တိုက်တွန်းခဲ့ကြပါတယ်။
လန်ဒန်မြို့က မီးပွိုင့်တခုမှာ ကားတံခါးဖွင့်ထားတဲ့ မူဒရစ်ကို အာဆင်နယ်ပရိသတ်တချို့က နောက်ပြောင်တဲ့အနေနဲ့ စကားပြောခဲ့ကြတာပါ။
ပရိသတ်တဦးက အာဆင်နယ်ဘရို၊ မူဒရစ်အာဆင်နယ်ဆိုပြီး ကားထဲကနေကြည့်နေတဲ့ မူဒရစ်ကို လှမ်းပြောခဲ့ပါတယ်။
ပြီးတော့ “မင်းရဲ့အိပ်မက်အသင်းဆီ လာခဲ့လိုက်ပါ။ မင်းအနေနဲ့ အာဆင်နယ်ဆီသာ ပြောင်းရွှေ့လာခဲ့ရင် ပရီးမီးယားလိဂ်ဖလား ရယူနိုင်မယ်” လို့လည်း ပရိသတ်တဦးက မူဒရစ်ကို ပြောခဲ့တာပါ။
ချဲလ်ဆီးက ဝက်စ်ဟမ်းကို ၃ ဂိုး ၁ ဂိုးနဲ့ ရှုံးနိမ့်ထားတာကိုလည်း မူဒရစ်ကို လှမ်းပြောခဲ့ကြပါသေးတယ်။
အာဆင်နယ်ဟာ မနှစ်တုန်းက မူဒရစ်ကို ခေါ်ယူနိုင်ဖို့ အလွန်နီးစပ်ခဲ့ပြီးမှ ချဲလ်ဆီးအသင်းက ကြားဖြတ်ခေါ်ယူသွားခဲ့တာပါ။
အာဆင်နယ်ပရိသတ်တွေရဲ့ ပြောစကားအပေါ် မူဒရစ်ဘက်ကတော့ စကားပြန်ပြောတာ မရှိဘဲ အဆုံးသတ်မှာ ခေါင်းညိတ်ပြခဲ့တာကို တစ်တော့ခ်ဗီဒီယိုတခုမှာ ရေပန်းစားခဲ့ပါတယ်။
