မန္တလေး၊ ချမ်းအေးသာစံမြို့နယ်၊ ချမ်းအေးသာစံ (အရှေ့) ရပ်ကွက်၊ ၂၉ လမ်းနဲ့ လမ်း ၈၀ ထောင့်၊ အမှတ် ၄၇၂ မှာရှိတဲ့ မန်းဧရာဝတီ တည်းခိုခန်း လေးလွှာကနေ ဩဂုတ် ၂၁ ရက် ညပိုင်းက အမျိုးသား တယောက် ခုန်ချသေဆုံးသွားတယ်လို့ မြို့ခံတွေက ပြောပါတယ်။
အဆိုပါ ၆ ထပ်အမြင့်ရှိ တည်းခိုခန်းမှာ သေဆုံးသွားသူဟာ တည်းခိုခန်းပိုင်ရှင်ရဲ့ သားဖြစ်သူ အသက် ၃၃ နှစ်အရွယ် ကိုရဲမြင့်လို့ သိရပြီး ည ၈ နာရီလောက်က တည်းခိုခန်း ၄ လွှာအမြင့်ကနေ မြေပြင်ပေါ်ကို မှောက်ရက်ကျကာ သေဆုံးခဲ့တာ ဖြစ်ပါတယ်။
မြို့ခံကယ်ဆယ်ရေးအသင်း ဝာာဝန်ရှိသူတဦးက “ပတ်ဝန်းကျင်က ပြောတာတော့ တိုက် ၄ ထပ်ပေါ်ကနေ ခုန်ချတာ။ အသက်က ၃၃ နှစ်၊ ခြေထောက် နှစ်ဖက်နဲ့ ဗိုက်ထိခိုက်မိပြီး သေဆုံးသွားပါတယ်။ မန္တလေးဆေးရုံကြီးကို ပို့ပေးထားပါတယ်” လို့ ပြောပါတယ်။
သက်ဆိုင်ရာနဲ့ ကယ်ဆယ်ရေးအသင်းတွေ ရောက်ရှိစစ်ဆေးချိန်မှာတော့ ခြေထောက် ၂ ချောင်းကျိုး၊ ဗိုက်ပွင့် အူထွက်ဒဏ်ရာနဲ့ ပွဲချင်းပြီး သေဆုံးနေပြီလို့ သိရပါတယ်။
အနီးအနားနေသူတွေရဲ့ ပြောပြချက်အရ သေဆုံးသူဟာ Magic Mushroom မှော်မှိုလို့ခေါ်တဲ့ အဆိပ်ရှိ ထင်ယောင်ထင်မှားဖြစ်စေတဲ့ မှိုတမျိုးကို ဝယ်သုံးစွဲနေခဲ့တာဖြစ်ပြီး အဆိုပါမှိုကြောင့် စိတ်ပုံရိပ်အမှားမြင်ကာ အခုလို ခုန်ချသေဆုံးသွားတာလို့ ဆိုပါတယ်။
ရုပ်အလောင်းကို ပရဟိတဓာရီအသင်းကားနဲ့ မန္တလေးပြည်သူ့ဆေးရုံကြီး ရင်ခွဲဌာနကို ပို့ဆောင်ပေးခဲ့တယ်လို့ သိရပြီး သေဆုံးမှုအတွက် ချမ်းအေးသာစံရဲတပ်ဖွဲ့က စုံစမ်းစစ်ဆေးနေတယ်လို့ သိရပါတယ်။
