ကချင်ပြည်နယ် ဖားကန့်မြို့ မနရွာ မနတာဝါတိုင်ဘေးက မြေစာပုံ ပြိုကျပြီး အယောက် ၄၀ ခန့် ပါသွားတယ်လို့ မျက်မြင်ဒေသခံတဦးက ပြောပါတယ်။

ဩဂုတ် ၁၃ ရက် ညနေ ၃ နာရီခွဲ ဝန်းကျင်က ကျောက်စိမ်းလုပ်ကွက် ရေအိုင်က မြေစာပုံပြိုကျခဲ့တဲ့ အရှိန်နဲ့ ပေ ၆၀ ခန့်အထိ ရေလှိုင်းမြင့်တက်ခဲ့ပြီး အနီးအနားက လက်ကျင်းတူးသမားတွေ ရွှေမျောတိုက်သူအားလုံး အယောက် ၄၀ လောက် ပါသွားတယ်လို့ ဆိုပါတယ်။

“မြေစာပြိုကျတော့ အဲ့က ကျောက်စိမ်းလုပ်ကွက် ရေအိုင်က မြေပြိုကျတဲ့ အရှိန်နဲ့ ပေ ၆၀/၇၀ အထိတောင် မြင့်တက်သွားတာ။ ကယ်ဆယ်ရေးတွေတော့ ရောက်နေပြီ။ ၃ ယောက်က လွတ်လာတယ်။ ပါသွားတဲ့သူတွေ တယောက်မှတော့ ပြန်မတွေ့သေးဘူး။ အယောက် ၄၀ လောက် အထိ ပါသွားတာ။ အခုထိ ရှာနေကြတုန်းပဲ။”

မြေစာပုံပြိုကျမှုကြောင့် ဘယ်နှဦး သေဆုံး၊ ဒဏ်ရာရတယ်ဆိုတာ မသိရသေးဘဲ ဒီဗွီဘီက ဆက်လက် စုံစမ်းမေးမြန်းနေဆဲ ဖြစ်ပါတယ်။ 

ဖားကန့်မြို့နယ်အတွင်း ကျောက်စိမ်းလုပ်ကွက်တွေရှိ မြေစာပုံတွေ နှစ်စဉ်ပြိုကျမှုတွေ ဖြစ်ပေါ်နေပြီး အဲဒီမြေပြိုကျမှုတွေကြောင့် ရေမဆေးကျောက်တူးသမား ရာနဲ့ချီ သေဆုံးမှုတွေ ရှိခဲ့ပြီး မိုးတွင်းကာလမှာ မြေပြိုမှုဆွေ မကြာခဏ ဖြစ်ပေါ်နေဆဲ ဖြစ်ပါတယ်။