မြန်မာနိုင်ငံမှာ မေ ၁၄ ရက်က တိုက်ခတ်သွားခဲ့တဲ့ အင်အားအလွန်ပြင်းတဲ့ မိုခါ ဆိုင်ကလုန်းမိုခါကြောင့် ထိခိုက်ဆုံးရှုံးမှုပျှမ်းမျှ အမေရိကန် ဒေါ်လာ ၂ ဒသမ ၂၄ ဘီလီယံ ရှိခဲ့တယ်လို့ ကမ္ဘာ့ဘဏ် ကသြဂုတ် ၁၀ မှာ ခန့်မှန်းထုတ်ပြန်ပါတယ်။
နိုင်ငံတကာအဖွဲ့အစည်းတွေကို စစ်ကောင်စီက မြန်မာနိုင်ငံအတွင်းဝင်ရောက်ဖို့ ကန့်သတ်ထားတာကြောင့် ကမ္ဘာ့ဘဏ်ဟာ မိုခါမုန်တိုင်းကြောင့်ပျက်စီးဆုံးရှုံးမှုကိုခန့်မှန်းဖို့ Global Rapid Post-Disaster Damage Estimation(GRADE) နည်းစနစ်ကိုသုံးခဲ့ရပါတယ်။ ဒီစနစ်ဟာ အရင်းအနှီးစတော့ရဲ့ ပျက်စီးဆုံးရှုံးမှုကို ခန့်မှန်းဖို့ အဝေးထိန်း၊ ဒက်စ်တော့ခွဲခြမ်းစိတ်ဖြာမှုတစ်ခု ဖြစ်ပါတယ်။
GRADE နဲ့ တွက်ချက်မှုအရ မြန်မာနိုင်ငံမှာ မိုခါမုန်တိုင်းကြောင့် စုစုပေါင်းတိုက်ရိုက်ပျက်စီးမှု ပျမ်းမျှခန့်မှန်းချက်မှာ အမေရိကန်ဒေါ်လာ ၂ ဒသမ ၂၄ ဘီလီယံဖြစ်ပြီး ၂၀၂၁ GDPရဲ့ ၃ဒသမ ၄ ရာခိုင်နှုန်းခန့်ရှိခဲ့ပါတယ်။
ထိခိုက်ပျက်စီးမှုတွက်ချက်ရာမှာ လူနေအိမ်၊ လူနေအိမ်မဟုတ်တဲ့ အဆောက်အအုံတွေနဲ့ စိုက်ပျိုးရေးလုပ်ငန်းတွေကို အဓိကတွက်ချက်ခဲ့ပြီး ပျက်စီးဆုံးရှုံးမှုရဲ့ ၈၄ ရာခိုင်နှုန်းဟာ ရခိုင်ပြည်နယ်နဲ့ စစ်ကိုင်းတိုင်းတို့ဖြစ်ပြီး မန္တလေး၊ မကွေးနဲ့ချင်းတို့လည်း ထိခိုက်ခဲ့ပါတယ်။
မိုခါမုန်တိုင်းကြောင့် မြန်မာတစ်နိုင်ငံလုံးအတိုင်းအတာနဲ့ ရခိုင်ပြည်နယ်က အဆိုးရွားဆုံးထိခိုက် ပျက်စီးခဲ့တာ ဖြစ်ပြီး ခရိုင် ၇ ခုနဲ့ မြို့နယ် ၁၇ မြို့နယ်မှာ လူဦးရေ ၁ ဒသမ ၂ သန်း ထိခိုက်ခဲ့ပါတယ်။
ရခိုင်ပြည်နယ်အတွင်းရှိ ပြည်တွင်းနေရပ်စွန့်ခွာတိမ်းရှောင်(IDP) စခန်းတွေမှာလည်း ပျက်စီးဆုံးရှုံးမှုတွေရှိခဲ့ပြီး လူ ၁၀၀ ကျော် သေဆုံးခဲ့ပါတယ်။
မိုခါမုန်တိုင်းကြောင့် ရခိုင်၊ စစ်ကိုင်း၊ မကွေး၊ မန္တလေးနဲ့ ချင်းစတဲ့ တိုင်းနဲ့ပြည်နယ် ၅ ခုမှာ ရေကြီးရေလျှံပြီး ကျန်းမာရေးနဲ့ ပညာရေးနဲ့ ဆိုင်တဲ့ အဆောက်အဦတွေ ပျက်စီးသွားတဲ့အပြင် ဆက်သွယ်ကွန်ရက်တွေနဲ့ သယ်ယူပို့ဆောင်ရေးစနစ်တွေလည်း ပျက်စီးသွားခဲ့ပါတယ်။
