အခြေခံပညာ Grade-12 စာမေးပွဲရဲ့ ရလဒ်ကို အအောင်/အရှုံး ရလဒ်အဖြစ် ကြေညာမှာမဟုတ်ဘဲ Grade A, Grade B, Grade C ဆိုပြီး အဆင့်သုံးဆင့်ခွဲပြီး ကြေညာမှာဖြစ်တယ်လို့ စစ်ကောင်စီပညာရေးဌာနက သိရပါတယ်။
အဆိုပါ စာမေးပွဲမှာ Grade A ရရှိတဲ့ ကျောင်းသားကျောင်းသူတွေအနေနဲ့ မိမိတို့ယူထားတဲ့ ဘာသာတွဲနဲ့ ကိုက်ညီပါက မြန်မာနိုင်ငံအတွင်းရှိ ဘယ်တက္ကသိုလ်ကိုမဆို တက်ရောက်ခွင့် လျှောက်ထားနိုင်မှာဖြစ်ပြီး Grade B နဲ့ Grade C ရရှိတဲ့ ကျောင်းသားကျောင်းသူတွေအနေနဲ့ သတ်မှတ်ထားတဲ့ တက္ကသိုလ်တွေကိုသာ လျှောက်ထားနိုင်မှာဖြစ်တယ်လို့ ပညာရေးဌာနက အရာရှိတဦးက ပြောပါတယ်။
တက္ကသိုလ်ဝင်ခွင့်လျှောက်ထားသူတွေကို သက်ဆိုင်ရာတက္ကသိုလ်တွေက အနည်းဆုံး ၂ ဘာသာ (အင်္ဂလိပ်စာ+ဇီဝ (သို့မဟုတ်) သင်္ချာ)၊ အများဆုံး ၄ ဘာသာ (အင်္ဂလိပ်စာ+ဇီဝ (သို့မဟုတ်) သင်္ချာ+ရူပ (သို့မဟုတ်) ဘောဂ+ဓာတု) ဘာသာရပ်တွေကို ထပ်မံဖြေဆိုပြီးမှသာ ဝင်ခွင့်ရွေးချယ်မှာ ဖြစ်ပါတယ်။
အထက်တန်းပညာ သင်ယူပြီးစီးကြောင်း လက်မှတ် (HSCC) ရရှိတဲ့ ကျောင်းသား ကျောင်းသူတွေကတော့ နည်းပညာသိပ္ပံ၊ ကွန်ပျူတာကောလိပ်၊ အသက်မွေးဝမ်းကျောင်း ပညာသင်သိပ္ပံ၊ စိုက်ပျိုးရေး မွေးမြူရေးသိပ္ပံ၊ ဆရာအတတ်သင်ကောလိပ်တွေကို တက်ရောက်နိုင်တယ်လို့ အရာရှိက ရှင်းပြပါတယ်။
အဆိုပါ ကောလိပ်၊ သိပ္ပံတွေမှာ ၂ နှစ် ဒါမှမဟုတ် ၃ နှစ် တက်ရောက်သင်ယူပြီးပါက ဒီပလိုမာလက်မှတ်တွေ ရရှိပြီး လုပ်ငန်းခွင်ကိုဝင်ရောက်နိုင်သလို တက္ကသိုလ်အသီးသီးကို ဆက်လက်တက်ရောက်လိုပါကလည်း ပေါင်းကူးအစီအစဉ်နဲ့ မိမိတို့ရရှိထားတဲ့ ဒီပလိုမာ လက်မှတ်တွေနဲ့ ကိုက်ညီတဲ့ ဘာသာရပ်တက္ကသိုလ်တွေရဲ့ ဒုတိယနှစ် ဒါမှမဟုတ် တတိယနှစ်တွေကို တက်ရောက်နိုင်ကာ တက္ကသိုလ်ဘွဲ့ကို ရရှိနိုင်မယ်လို့ သိရပါတယ်။
