ရှမ်းပြည်နယ်မြောက်ပိုင်း၊ မူဆယ်မြို့၊ ဟိုနားရပ်ကွက်၊ စက်မှုဇုန်က ကားဝပ်ရှော့တခုမှာ ဩဂုတ် ၄ ရက် ညနေပိုင်းက ကားတစီးပေါက်ကွဲခဲ့တာကြောင့် လူ ၁ ယောက် သေဆုံးသွားပြီး ၅ ယောက် ဒဏ်ရာရရှိခဲ့တယ်လို့ မြို့ခံတွေက ပြောပါတယ်။
ညနေ ၄ နာရီလောက်ကဖြစ်တာလို့ သိရပြီး ဝပ်ရှော့မှာ ပြင်ဆင်ဖို့ လာအပ်ထားတဲ့ ကားတစီးရဲ့အနောက်ခန်းက ပေါက်ကွဲခဲ့တာဖြစ်ပါတယ်။
ကယ်ဆယ်ရေးအသင်း တာဝန်ရှိသူတယောက်က “ဝပ်ရှော့အပ်ထားရင်း ကားပေါက်ကွဲတယ် လို့ပဲ သိထားပါတယ်၊ ယာဉ်မောင်းအမျိုးသားကတော့ သေဆုံးပါတယ်။ အသက် ၃၀ လောက်ပါပဲ။ ဆိုင်ထဲက ယောင်္ကျား ၅ ယောက် တော့ ဒဏ်ရာရထားပါတယ်။ မူဆယ်ဆေးရုံကြီးပဲ ပို့ပေးထားပါတယ် ” လို့ ဆိုပါတယ်။
ကားပေါက်ကွဲမှုကြောင့် အဲဒီကားရဲ့ ယာဉ်မောင်းဖြစ်သူ အသက် ၃၀ အရွယ် အမျိုးသားရဲ့ မျက်နှာပျက်စီး၊ ဦးခေါင်း၊ ရင်ဘတ်ထိခိုက်တဲ့ ပြင်းထန်ဒဏ်ရာတွေရလို့ ပွဲချင်းသေဆုံးသွားပြီး ဆိုင်အတွင်းက အမျိုးသား ၅ ယောက်မှာတော့ မစိုးရိမ်ရတဲ့ ထိခိုက်ဒဏ်ရာတွေရသွားတာပါ။
ပေါက်ကွဲမှုအတွင်း ကားတစီးလုံးအပါအဝင် ဆိုင်ကယ်တစီးနဲ့ ဆိုင်အတွင်းပစ္စည်းတွေ ပျက်စီးဆုံးရှုံးခဲ့ပြီး အဲဒီနေရာကို စစ်ကောင်စီရဲတွေက လာရောက်စစ်ဆေးခဲ့ကြကာ မူဆယ်မီးသတ်တပ်ဖွဲ့နဲ့ ရှာဖွေကယ်ဆယ်ရေးအသင်းတွေက ကူညီကယ်ဆယ်ရေး လုပ်ခဲ့ကြပါတယ်။
သေဆုံးသူကို အတည်ပြုနိုင်ဖို့ စုံစမ်းစစ်ဆေးနေဆဲဖြစ်ပြီး ကားပေါက်ကွဲမှုဟာ ဗုံးပေါက်ကွဲမှုလား၊ မတော်တဆပေါက်ကွဲမှုလားဆိုတာကိုတော့ သီးခြား အတည်မပြုနိုင် သေးပါဘူး။
