ရန်ကုန်မှာ ရွှေဘိုပေါ်ဆန်းမွှေးတအိတ်ကို ကျပ် ၁ သိန်းခွဲရှိနေချိန် တအိတ်ကို ကျပ် ၁ သိန်းနှစ်သောင်းနဲ့ ရောင်းမယ်လို့ မြန်မာနိုင်ငံဆန်စပါးအသင်းချုပ်က ကြေညာထား ပါတယ်။
အဲဒီလိုရောင်းချပေးတာဟာ ဆန်ဈေးကွက်နဲ့ ဆန်ဈေးနှုန်းတွေ တည်ငြိမ်ဖို့ ရောင်းချပေးတာဖြစ်ပြီး မှတ်ပုံတင်တခုကို ရွှေဘိုပေါ်ဆန်းတအိတ်နဲ့ဧည့်မထ တအိတ်တို့ ဝယ်ယူနိုင်မှာဖြစ်ပြီး အခုလ ၇ ရက်နေ့ကစလို့ ဝါးတန်းလမ်းနဲ့ ဘုရင့်နောင် ကုန်စည်ဒိုင်တို့မှာ စတင်ဝယ်ယူနိုင်မှာဖြစ်တယ်လို့သိရပါတယ်။
ရောင်းချပေးမယ့်ဆန်တွေကတော့ ရွှေဘိုပေါ်ဆန်းမွှေးတအိတ်ကို ကျပ် ၁၁၀,၀၀၀ နဲ့ ၁၂၀,၀၀၀၊ ဧရာဝတီပေါ်ဆန်းမွှေးတအိတ်ကို ၉၄,၀၀၀ နဲ့ ၉၇,၀၀၀ တန်၊ ဧည့်မထ(၁၀% စားဆန်) တအိတ်ကို ၆၅,၀၀၀၊ ဧည့်မထ( ၂၅ % စားဆန်)တအိတ်ကို ကျပ် ၆၀,၀၀၀ နဲ့ ရောင်းချပေးမှာဖြစ်ပါတယ်။
ဈေးလျော့တယ်ဆိုပေမယ့် ကုန်စည်ဒိုင်တွေနဲ့ အလှမ်းဝေးတဲ့နေရာတွေက လာရောက် ဝယ်ယူရမယ့်သူတွေအတွက် ပြင်ပပေါက်ဈေးအတိုင်း ဝယ်ယူနေရသလို ဖြစ်တဲ့အတွက် ရောင်းချပေးမယ့် ဆန်ဈေးနှုန်းက ဘာမှမထူးဘူးလို့ ဆန်ရောင်းချနေသူတွေက ပြောပါတယ်။
မြောက်ဒဂုံမြို့နယ်မှာ ဆန်ရောင်းချသူတယောက်က “ကျနော်တို့ လက်ရှိရောင်းနေတာ ၁ သိန်းခွဲ၊ မြို့နယ်အတွင်းဆို အိမ်အရောက်ပို့ပေးတယ်။ ဆန်အသင်းက ဆန်ဈေး ထိန်းညှိဖို့ အတွက်လုပ်တာဆိုပေမယ့် အများလက်လှမ်းမီအောင်မလုပ်နိုင်ဘဲ ဈေးနှုန်းကွာဟချက် ကြီးကြီးမားမား မထားပဲရောင်းတာဟာ ဆန်ဈေး ထိန်းညှိဖို့ ဆိုတာမဖြစ်နိုင်ဘူး” လို့ ပြောပါတယ်။
အာဏာသိမ်းစ ၂၀၂၁ ခုနှစ် ဧပြီလက ရွှေဘိုပေါ်ဆန်းတအိတ်ကို ပြင်ပပေါက်ဈေး ကျပ် ၆ သောင်းနီးပါးလောက်အထိဖြစ်လာချိန်မှာ မြန်မာနိုင်ငံဆန်စပါးအသင်းချုပ်က ရွှေဘို ပေါ်ဆန်းမွှေး တအိတ်ကို ကျပ် ၅၄,၀၀၀ နဲ့ရောင်းချပေးခဲ့ပေမယ့် ဆန်ဈေးတွေဟာ ၂ နှစ်ကျော်အတွင်း ၂ ဆလောက်တက်လာခဲ့တာ ဖြစ်ပါတယ်။
နှစ်သောင်းတန် မထုတ်ဝေခင်က ရွှေဘိုပေါ်ဆန်းတအိတ်ကို ပြင်ပမှာ ကျပ် တသိန်းနှစ်သောင်း ကနေ တသိန်းသုံးသောင်းအထိ ဈေးပေါက်ခဲ့ပြီး နှစ်သောင်းတန်ထုတ်ဝေပြီးနောက် ကျပ် တသိန်းခွဲအထိ ဈေးပေါက်နေတယ် လို့ သိရပါတယ်။
