ကချင်ပြည်နယ်၊ တနိုင်းခရိုင်ရှိ ရှင်ဗွေယန်နဲ့ စစ်ကိုင်းတိုင်း နာဂ ကိုယ်ပိုင်အုပ်ချုပ်ခွင့်ရဒေသကြီး နန်းယွန်းမြို့နယ် လမ်းပိုင်းကြားမှာ  မိုးကြီးပြီး မြေပြိုကျမှုတွေကြောင့် လမ်းပန်းဆက်သွယ်ရေး ပြတ်တောက်ကာ ပြည်သူတွေ အဘက်ဘက်က ဒုက္ခရောက်နေပါတယ်။

ဇူလိုင်လတုန်းက မိုးသည်ထန် ရေတိုက်စားပြီး လမ်းပိုင်းက ကားနဲ့ ဆိုင်ကယ်တွေ သွားမရလောက်အောင် ပျက်စီးသွားလို့ ခရီးသွားလာ ကုန်ပစ္စည်းတင်ပို့မှု၊ ခရီးသွားလာမှုတွေ ခဏခဏ ရပ်ဆိုင်းသွားရတာမျိုး ​ဖြစ်နေတယ်လို့ ရှင်ဗွေယန်ဒေသခံတွေက ပြောပါတယ်။

တောင်ပေါ်ကားသမားတဦးက “ခုတော့ ဒေသခံတွေကလည်း တတ်နိုင်သလောက်ဝိုင်း၊ လမ်းတံတားဌာနကလည်း လာကြည့်တော့ ဆိုင်ကယ်တွေ ဖြတ်လို့ရတဲ့ အနေအထားတော့ ရှိတယ်။ ကားကျ ဟိုဘက်နဲ့ ဒီဘက် ချိန်းပြီး ကဲ့ရတယ်။ ပါဂျဲရိုးတစီးစာဆိုရင် တနေကုန်ကဲ့ရတယ်” လို့ ပြောပါတယ်။

​ရေတိုက်စားပြီး အကြီးအကျယ်ပျက်တဲ့အပိုင်းက Km (218.00-219.00) ကြား ဖြစ်ကြောင်းလည်း သိရပါတယ်။

ဒေသခံတွေက တရုတ်ဘက်ကမှာထားတဲ့ ရေပြွန်တွေ၊ စက်ယန္တရား​တွေ ရောက်လာပြီး ပြင်ဆင်မှုအပိုင်းတွေ လုပ်ပြီးရင်တော့ နည်းနည်း ပိုအဆင်ပြေမယ်လို့ မျှော်လင့်နေပါတယ်။

ပန်ဆောင်က နာဂလူမျိုး ဒေသခံတဦးက “အိန္ဒိယကလူတွေ မြန်မာနိုင်ငံ ရှင်ဗွေယန်ဘက်ကို မြေပုံလေးထောက် ၃ နာရီလောက်ပဲကြာမယ်ဆိုပြီး လာတာ ၁၃ ရက်လောက်ကြာသွားတယ် လို့ ရယ်မောပြောဆိုရလောက်အောင် ပန်ဆောင် နန်းယွန်းလမ်းပိုင်းလည်း အရမ်းဆိုးဝါးသလို နန်းယွန်း ရှင်ဗွေယန်လမ်းက ကားသမားတွေကိုလည်း တောင်ပေါ်ကားသမားတွေလို့ သုံးနှုန်းကြတာပါ။”

နာဂလူမျိုးတွေအတွက်က နန်းယွန်း ပန်ဆောင်ဒေသတွေဟာ နာဂမြေပြန့်ဒေသဖြစ်ကြောင်း ပြောဆိုပြီး လမ်းခရီးအခြေအနေ ဆိုးဝါးမှုနဲ့ ယဥ်ပါးနေကြတဲ့ ဒေသတွေဖြစ်ပါတယ်။

မေလကနေစတင်တဲ့ မိုးရာသီရောက်တိုင်း ဖြစ်နေကျလို့ ဒေသခံတွေက သတ်မှတ်ကြတာဖြစ်ပြီး ​မြစ်ကြီးနား-ပတ်ဆောင်လမ်းပိုင်း တင်ဒါအောင်ထားသူတွေကလည်း ကိုဗစ်ကာလ စီးပွားရေးကျဆင်းမှု၊ အသွားအလာ လမ်းခရီး တင်းကျပ်မှုတွေကြောင့် ပြီးဆုံးအောင် မဖောက်လုပ်နိုင်တာ ၃ နှစ်ထဲ ဝင်ခဲ့ပြီလို့သိရပါတယ်။