ပြည်တွင်းမှာ အသစ်တီထွင်ထားတဲ့ App က အစ္စရေးသိမ်းပိုက်ထားတဲ့ အနောက်ဘက်ကမ်းနဲ့ ဂျေရုဆလင်မှာရှိတဲ့ ပါလက်စတိုင်းယာဉ်မောင်းတွေကို အစ္စရေးစစ်တပ် စစ်ဆေးရေးဂိတ်တွေကို ရှောင်ကွင်း လမ်းကြောင်းပြောင်းစေပြီး သူတို့ဦးတည်ရာကို ရောက်ဖို့ တခြားလမ်းကြောင်းတွေကို သုံးဖို့ ကူညီပေးပါတယ်။

၂၀၂၃ ခုနှစ် ဇွန်လမှာ စတင်ထုတ်လုပ်ခဲ့ပြီး ပါလက်စတိုင်း စေတနာ့ဝန်ထမ်းတွေက ဒီဇိုင်းထုတ်ထားတဲ့ ယာဉ်ကြောပိတ်ဆို့မှုလို့ အဓိပ္ပာယ်ရတဲ့ ‘အက်ဇ်မယ်’ အပလီကေးရှင်းဟာ သုံးစွဲသူတွေကို လမ်းပိတ်တာနဲ့ ယာဉ်ကြောပိတ်ဆို့မှုဆိုင်ရာ ဒေတာအရင်းအမြစ်တွေကို စုစည်းပေးပြီး စစ်ဆေးရေးဂိတ်တွေ ဖြတ်ကျော်ဖို့ ပါလက်စတိုင်းတွေ စောင့်ဆိုင်းနေရတဲ့ အချိန်ကို တိုစေဖို့ ရည်ရွယ်ထားပါတယ်။

အပလီကေးရှင်းကို အခုအသုံးပြုသူ နှစ်သောင်းခွဲလောက်ရှိတယ်လို့ အက်ဇ်မယ် အပလီကေးရှင်းရဲ့ စီးပွားရေးလုပ်ငန်း ဖော်ဆောင်သူ ဘက်ဂျ် အယ်လ် လူးကက် လူမှုစင်တာလူ့အဖွဲ့အစည်းမှ အမှုဆောင်မန်နေဂျာ မွန်တီဇာ ခိုက်ဒက်ဇ်က ပြောပါတယ်။

အစ္စရေးဟာ ၁၉၆၇ အရှေ့အလယ်ပိုင်းစစ်ပွဲမှာ အနောက်ဘက်ကမ်းကို သိမ်းပိုက်ခဲ့ပြီး စစ်ဆေးရေးဂိတ်တွေကို ထိန်းသိမ်းရာမှာ လုံခြုံရေးစိုးရိမ်မှုတွေကို ကိုးကားဖော်ပြပါတယ်။

ဒါပေမဲ့ လမ်းပိတ်ဆို့မှုတွေဟာ ပါလက်စတိုင်းတို့ရဲ့ သွားလာလှုပ်ရှားမှုကို ကန့်သတ်ထားပြီး သူတို့ရဲ့ စီးပွားရေးကို ထိခိုက်စေတယ်လို့ ကမ္ဘာ့ဘဏ်က ဆိုထားပါတယ်။

အနောက်ဘက်ကမ်းမှာနေတဲ့ ထောင်နဲ့ချီတဲ့ ပါလက်စတိုင်းတွေဟာ လုံခြုံရေးအခြေအနေပေါ် မူတည်ပြီး မြို့တွေနဲ့ ဂျေရုဆလင်မြို့တွေဆီ လာရင် အစ္စရေးရဲတပ်ဖွဲ့က ကန့်သတ်ချက်တွေနဲ့ ထိန်းချုပ်ထားတဲ့ စစ်ဆေးရေးဂိတ်တွေကို ဖြတ်ကျော်ရမှာပါ။

တချို့စစ်ဆေးရေးဂိတ်တွေဟာ ကျေးရွာတွေနဲ့ မြို့ဝင်ပေါက်တွေမှာ ကာလကြာရှည် ရှိနေပေမဲ့ တချို့ကတော့ အခြေအနေ တင်းမာမှုတွေ မြင့်တက်လာချိန်မှာ ပေါ်ပေါက်လာတာပါ။

ဒီစစ်ဆေးရေးဂိတ်တွေမှာ ယာဉ်ကြောပိတ်ဆို့မှုကြောင့် ခရီးသည်တွေ နာရီပေါင်းများစွာ စောင့်ဆိုင်းနေရနိုင်လို့ လူသိများပါတယ်။

Source - Reuters