ကရင်ပြည်နယ်၊ ဘုရားသုံးဆူမြို့၊ ထိုင်း-မြန်မာနယ်စပ်က စစ်ကောင်စီရဲ့ မူဂျာထိပ်စခန်းကို တော်လှန်ရေးပူးပေါင်းတပ်တွေက မနေ့က ဒရုန်းနဲ့ ဗုံးချ တိုက်ခိုက်ခဲ့ကြပြီး အဆောက်အအုံတချို့ ပျက်စီးသွားပါတယ်။

မွန်ပြည်တော်လှန်ရေးတပ်(MSRF)၊ ရေးလေတပ်(YAF)၊ ထားဝယ်ခရိုင် အမှတ် ၂ တပ်ရင်း၊ ကံပေါက်ဒေသ ပြည်သူ့ကာကွယ်ရေးတပ်၊ ထားဝယ် ပြည်သူ့လွတ်မြောက်ရေး တပ်၊ ဒေါနစစ်ကြောင်းနဲ့ ABSDF တပ်ရင်း ၁ တို့ပူးပေါင်းပြီး ဇူလိုင် ၂၈ ရက် မနက်ပိုင်းက မောင်းသူမဲ့လေယာဉ်နဲ့ ဗုံးသီး ၆ လုံးချ တိုက်ခိုက်ခဲ့တာ လို့ သက်ဆိုင်ရာအဖွဲ့တွေက သတင်းထုတ်ပြန်ပါတယ်။

MSRF ရဲ့ တာဝန်ရှိသူတယောက်က "မူဂျာထိပ်စခန်းက အဆောက်အဦနှစ်ခု ဗုံးချလို့ ပျက်စီးသွားတာတွေ့ရတယ်။ အထိခိုက်ကျဆုံးကတော့ စုံစမ်းနေဆဲပဲ" လို့ ဒီဗွီဘီကို ပြောပါတယ်။

အဲဒီတိုက်ခိုက်မှုကို မွန်-တနင်္သာရီ ပူးပေါင်းစစ်ဆင်ရေးအဖြစ် ဒုတိယအကြိမ် ပြုလုပ်တာဖြစ်ပြီး မဟာမိတ်အနေနဲ့ ထားဝယ်အခြေစိုက် ထားဝယ် ပြည်သူ့လွတ်မြောက်ရေးတပ်ဖွဲ့တခု ထပ်မံပူးပေါင်းပါဝင်လာခဲ့ပါတယ်။

မူဂျာထိပ်စခန်းကို တိုက်ခိုက်ခဲ့တဲ့ မိုးကြိုးစစ်ဆင်ရေးကို အခုလဆန်းပိုင်းက ရေးမြို့နယ်မှာ ပြုလုပ်ခဲ့တဲ့ စစ်ဆင်ရေးထက်ပိုပြီး အားရတယ်လို့ MSRF တာဝန်ခံက ဆက်ပြောပါတယ်။

"အရင်က mission တုန်းက  လေယာဉ် ၃ စင်းမှာ တစင်းက အလုပ်မလုပ်ခဲ့ဘူး။ ဗုံးသီး ၃ လုံးပဲ ချခဲ့ရတယ်။ အခုစစ်ဆင်ရေးမှာတော့ လေယာဉ် ၃ စင်းနဲ့ဗုံးသီး ၆ လုံးချနိုင်ခဲ့တယ်" လို့ ပြောပါတယ်။

မူဂျာထိပ်စခန်းဟာ ဘုရားသုံးဆူမြို့ကို ဝန်းရံထားတဲ့အပြင် လက်နက်ကြီးထားရှိပြီး စစ်ရေးအရ အရေးပါတဲ့စခန်းဖြစ်တာကြောင့် အခုလိုတိုက်ခိုက်ခဲ့ရတာလို့ MSRF တပ်ဖွဲ့က ဆိုပါတယ်။

ဇူလိုင်လအလယ်ကလည်း ရေးမြို့အခြေစိုက် စစ်ကောင်စီတပ်စခန်း ၃ ခုကို အခုစစ်ဆင်ရေးမှာပါဝင်တဲ့ မဟာမိတ်အဖွဲ့တွေက မွန် -တနင်္သာရီ ပထမအကြိမ် ပူးပေါင်းစစ်ဆင်ရေးအဖြစ် တိုက်ခိုက်ခဲ့ကြပါတယ်။