ကန်ပက်လက်တွင် စစ်ကောင်စီတပ် တိုက်ခိုက်ခံရ
DVBချင်းပြည်နယ်၊ ကန်ပက်လက်မြို့နယ်မှာ ဇူလိုင် ၁၈ ရက်နဲ့ ၁၉ ရက်နေ့တွေက စစ်ကောင်စီတပ်ဖွဲ့ဝင်တွေ တိုက်ခိုက်ခံရပြီး ထိခိုက်သေဆုံးသူ များပြားကာ စစ်ကောင်စီဘက်ကလည်း လေကြောင်းတိုက်ခိုက်ခဲ့တယ်လို့ CDF-ကန်ပက်လက်ကနေ သိရပါတယ်။
CDF-ကန်ပက်လက်ရဲ့ တပ်မဟာမှူး ကိုထွန်းလိန်းက “ကန်ပက်လက်မြို့နယ်၊ မဆာတွီရွာ အောက်နားမှာ ဇူလိုင် ၁၉ ရက် မနက်ပိုင်းက စစ်ကောင်စီတပ်နဲ့ CDF-ကန်ပက်လက်တို့ တိုက်ပွဲဖြစ်ပွားခဲ့ပြီး စစ်ကောင်စီဘက်က ၅ ယောက် သေဆုံးကာ အများအပြား ဒဏ်ရာရရှိပြီး ကျနော်တို့ဘက်က ရဲဘော် ၂ ယောက် ဒဏ်ရာရရှိကာ ဒဏ်ရာအခြေအနေကတော့ မစိုးရိမ်ရဘူး” လို့ ဒီဗွီဘီကို ပြောပါတယ်။
ဆွဲလွဲကျင်းနဲ့ မဆာတွီရွာကြားမှာလည်း ဇူလိုင် ၁၈ ရက် မနက် ၇ နာရီကနေ ၇ နာရီခွဲအထိ ဖြစ်ပွားခဲ့တဲ့ တိုက်ပွဲမှာ စစ်ကောင်စီဘက်က အရာရှိတယောက် အပါအဝင် ၅ ယောက် သေဆုံးကာ မနက် ၈ နာရီခွဲလောက်မှာ တိုက်ပွဲထပ်ဖြစ်ပြီး သူတို့ဘက်က ၃ ယောက် ထပ်မံသေဆုံးခဲ့တယ်လို့ ဆိုပါတယ်။
CDF-ကန်ပက်လက်ရဲ့ တပ်မဟာမှူး ကိုထွန်းလိန်းက “တိုက်ပွဲဖြစ်ပြီးနောက် စစ်ကောင်စီဘက်က မနက် ၉ နာရီခွဲလောက်ကနေ ၁၁ နာရီခွဲအထိ ဂျက်ဖိုက်တာ ၅ စီးနဲ့ မဆာတွီရွာထဲကို လက်နက်ကြီးနဲ့ ၅ လုံးပစ်တယ်။ ကျနော်တို့ရဲ့ ရှေ့ပွိုင့် စိုးမိုးကုန်းတွေကို တောက်လျှောက်ပစ်တာ၊ စုစုပေါင်း အလုံး ၂၀ လောက် ပစ်ခတ်သွားတယ်”လို့ ပြောပါတယ်။
လေကြောင်းတိုက်ခိုက်မှုအတွင်း CDF-ကန်ပက်လက်ဘက်က ရဲဘော်တွေနဲ့ ဒေသခံပြည်သူတွေ ထိခိုက်မှုမရှိခဲ့ဘဲ ဘုရားရှိခိုးကျောင်းတကျောင်းနဲ့ လူနေအိမ် ၅ လုံး ထိခိုက်ပျက်စီးခဲ့တယ်လို့ ဆိုပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
