မကွေးတိုင်း၊ ငဖဲမြို့နယ် ဇင်ပြွန်ကျေးရွာအုပ်စု ပျဥ်းဝပူးပေါင်းစစ် ဆေးရေးဂိတ်မှာ ဇူလိုင် ၁၇ ရက် မနက်က သင်္ကန်းဝတ် ရိုဟင်ဂျာ ၆ ဦးနဲ့ခေါ်လာသူ သီလရှင် ၁ ပါးကို စစ်ကောင်စီတပ်က ဖမ်းဆီးရမိခဲ့တယ်လို့ မြို့ခံတွေဆီက သိရပါတယ်။

စစ်တွေမြို့ကနေ ရန်ကုန်ကို ကြံတိုင်းအောင် Express ယာဥ်နဲ့လာရာ ငဖဲမြို့၊ ဇင်ပြွန်ကျေးရွာအုပ်စု ပျဉ်းဝပူးပေါင်းစစ်ဆေးရေးဂိတ်မှာ ဒီနေ့မနက်က ဖမ်းဆီးရမိခဲ့တာလို့ စစ်ဆေးရေးဂိတ်နဲ့ နီးစပ်သူတဦးက ဒီဗွီဘီကို ပြောပါတယ်။

"အမျိုးသားနှစ်ယောက်ရော ခေါ်လာတဲ့ ဆရာလေးကိုရော စစ်နေတယ်၊ လတ်တလော ဘာပုဒ်မနဲ့ဖွင့်လဲတော့ မသိဘူး။" 

ကြံတိုင်းအောင် Express ကားပေါ်မှ အမျိုးသား ၂ ဦးနဲ့ သီလရှင် ၁ ပါး၊ သင်္ကန်းဝတ် ရိုဟင်ဂျာ ၆ ဦးကို ငဖဲမြို့မရဲစခန်းက စစ်ဆေးနေတယ်လို့ မြို့ခံတွေဆီက သိရပါတယ်။

လက်တလောမှာ သင်္ကန်းဝတ် ရိုဟင်ဂျာ ၆ ဦးကို တင်ဆောင်လာတဲ့ ကြံတိုင်းအောင် ရန်ကုန်-စစ်တွေ Express ယာဥ်မောင်းတွေကိုလည်း စစ်ဆေးနေတယ်လို့ အုပ်ချုပ်ရေးနဲ့ နီးစပ်သူတွေဆီက သိရပါတယ်။

၂၀၂၃ ခုနှစ် ၆ လတာကာလအတွင်း ရိုဟင်ဂျာဖမ်းဆီးရရှိမှု ၁၀၀၀ နီးပါးရှိပြီး ထောင်ဒဏ်အမိန့်ချမှတ်ခံရသူ ၃၀၀ နီးပါးရှိတယ်လို့ သိရပါတယ်။