ထိုင်းနိုင်ငံအရှေ့မြောက်ပိုင်း ချွန်းပူးရီးခရိုင်ထဲမှာ ဇူလိုင် ၄ ရက်က ပျောက်ဆုံးနေတဲ့ ဂျာမန်အိမ်မြေ ပွဲစားလုပ်ငန်းရှင် Mr. Hans Peter Ralter Mack (အသက် ၆၂ နှစ်) ကို တာဝန်ရှိသူတွေက စုံစမ်းရှာဖွေနေရာမှာ ဇူလိုင် ၁၀ ရက် ည ၁၁ နာရီ လောက်မှာတော့ ရေခဲသေတ္တာထဲကနေ အပိုင်းပိုင်းခုတ်ခံထားရတဲ့ အလောင်းအဖြစ် ပြန်တွေ့တယ်လို့ ထိုင်းသတင်းတွေမှာ ဖော်ပြပါတယ်။
ဒီမတိုင်ခင် ချွန်းပူးရီးခရိုင် အထူးစုံစမ်းစစ်ဆေးရေးရဲတပ်ဖွဲ့ဝင်တွေဟာ ချွန်းပူးရီးခရိုင် ဘန်လမွန်းမြို့နယ် နောင်ပရီရပ်ကွက်ရှိ ဖလူးဝိလာအိမ်ရာထဲက ပျောက်ဆုံးသွားတဲ့ မစ္စတာ ဟန့် စ့်စ် ပီတာရဲ့ နေအိမ်အနီးတဝိုက် စီစီကင်မရာတွေကို စစ်ဆေးခဲ့ပါတယ်။
စစ်ဆေးချက်အရ နိုင်ငံခြားသား ၂ ဦးပါတဲ့ လူ ၄ ဦးဟာ အဆိုပါနေအိမ်ထဲကနေ ရေခဲသေတ္တာ ၁ လုံးကို သယ်မသွားပြီး အနက်ရောင် ဟိုင်းလပ်စ် ကား ၁ စီးပေါ်တင်သွားကြောင်း၊ အဆိုပါကား ဟာ အဲဒီအိမ်ရာနဲ့ ၅ ကီလိုမီတာကျော် ကွာဝေးတဲ့ နောင်ပရီရပ်ကွက် ချုတ်ချိုင်းဂါး ဒင်း ဟုမ်းအိမ်ရာရှိ နေအိမ် ၁ လုံးထဲ ဝင်သွားတယ်လို့ ဆိုပါတယ်။
အဆိုပါနေအိမ်ကို စစ်ဆေးဖို့အတွက် တရားရုံးကနေ ရမန်စာယူပြီးတဲ့နောက် မနေ့ည ၁၁ နာရီလောက်က သွားရောက်စစ်ဆေးခဲ့ကြောင်း၊ နေအိမ်မှာ ငှားရမ်းနေထိုင်သူရှိမနေဘဲ အိမ်ပိုင် ရှင်က တံခါးလာဖွင့်ပေးကြောင်း၊ ဟန့်စ်ပီတာရဲ့ အိမ်ကနေသယ်လာတဲ့ ရေခဲသေတ္တာကို အိပ်ခန်း ၁ ခန်းထဲမှာ တွေ့ရှိပြီး သေတ္တာရဲ့တံခါးကို ဆယ်လိုတိပ်နဲ့ ပိတ်ထားကာ မီးပလပ်လည်း ထိုးထားတယ်လို့ ဆိုပါတယ်။
အဆိုပါရေခဲသေတ္တာကို ဖွင့်ကြည့်ရာမှာတော့ လူရဲ့ ဦးခေါင်း၊ လည်ပင်း၊ ကိုယ်ခန္ဓာ၊ လက် ၂ ဘက်၊ ခြေတောက် ၂ ဘက် စသဖြင့် ၁၃ ပိုင်းပိုင်းထားတာကိုတွေ့ရပြီး ပျောက်ဆုံးနေသူ ဟန့်စ်ပီတာရဲ့ အလောင်းဖြစ်တယ်လို့ တာဝန်ရှိသူတွေက အတည်ပြုပါတယ်။
ဦးခေါင်းမှာ လေးလံသောအရာနဲ့ အထုခံထားရပြီး အိမ်ထဲမှာ သွေးစသွေးနအချို့၊ အသေးစား ဖြတ်လွှ ၁ ခုကိုပါ သက်သေအဖြစ် သိမ်းဆည်းရရှိတယ်လို့ ဆိုပါတယေ။
အိမ်ရှင်ဖြစ်သူ ထိုင်းအမျိုးသမီးက အဆိုပါအိမ်ကို နိုင်ငံခြားသား ၁ ဦးက တလကို ဘတ် ၉၀၀၀ နဲ့ ငှါးထားတာ ၃ လခန့်ရှိပြီဖြစ်ပြီး အခုလိုကြုံတွေ့ရတဲ့အပေါ် လွန်စွာထိတ်လန့်မိကြောင်း၊ ရှေ့ဆက် အိမ်ကိုဘယ်လိုလုပ်ရမှန်းမသိဘူးလို့ ပြောပါတယ်။
အိမ်ငှါးသူမှာ သေဆုံးသူနဲ့ သိကျွမ်းသူ မစ္စတာ အိုလပ်ဖြစ်ပြီး အဲဒီအိမ်မှာ မစ္စ ဖေးထားဆိုသူ ဂျာမန်အမျိုးသမီးပါ နေထိုင်တယ်လို့ ဆိုပါတယ်။
ဒီမတိုင်ခင်ကလည်း သူတို့ရဲ့ ဘဏ်ငွေစာရင်းထဲကို မစ္စတာ ဟန့်စ်ပီတာရဲ့ ပျောက်ဆုံးနေတဲ့ ထိုင်း ဘတ်ငွေ ၃ သန်း လွှဲထားတာတွေ့လို့ ရဲတပ်ဖွဲ့က ဖမ်းဝရမ်းထုတ်ထားကြောင်း၊ အဆိုပါ ဘတ်ငွေ ၃ သန်းဟာ သူတို့ ၂ ဦးရဲ့ ဘဏ်စာအုပ်မှာရော နောက်ထပ် ၂ ဦးရဲ့ ဘဏ်စာရင်းထဲကို ပါလွှဲ ထားတာတွေ့ကြောင်း၊ မစ္စတာ အိုလပ်ဖ်မှာ ပတ္တယားကမ်းခြေက အောက်ထ်လောအမည်ရှိ မာဖီးယားဂိုဏ်းနဲ့လည်း ဆက်စပ်နေကြောင်း၊ ထိုင်းလူမျိုးတွေလည်း ပါဝင်ပတ်သက်တယ်လို့ ယုံကြည်ကြောင်း၊ ဒီအမှုက ပစ္စည်းရယူလိုမှုကြောင့် ကျူးလွန်တယ်လို့ ယူဆကြောင်း ထိုင်းအမျိုးသား ရဲတပ်ဖွဲ့ ဒုရဲချုပ် စူရချေ့ဟတ်ဖန်းက သတင်းထောက်တွေကို ပြောပါတယ်။
မစ္စတာ ဟန့်စ်ပီတာမှာ ထိုင်းအမျိုးသမီး ၁ ဦးနဲ့ တွဲလျက်ရှိပြီး ဒီလ ၄ ရက်နေ့က အဆိုပါအမျိုးသမီးနဲ့ ချိန်းဆိုထားပေမယ့် ရောက်မလာဘဲ ပျောက်ဆုံးနေတာပါ။ သူ့ရဲ့ကားကိုတော့ အဆိုပါရပ်ကွက်ထဲမှာ ရပ်ထားတာတွေ့ပြီး တာဝန်ရှိသူတွေ စစ်ဆေးရာမှာ ကားထဲမှာ လူမရှိပါဘူး။
သူပျောက်ဆုံးနေတာကို လက်ရှိတွဲနေတဲ့ ထိုင်းအမျိုးသမီးရော၊ ဂျာမဏီနိုင်ငံက ဇနီးနဲ့ သားဖြစ်သူတို့ကပါ ရဲတပ်ဖွဲ့ နဲ့ ဂျာမဏီသံရုံးကို တိုင်ကြားထားပါတယ်။
ဂျာမဏီရှိ ဇနီး နဲ့ သားဖြစ်သူတို့ကလည်း ဖခင်ဖြစ်သူကို ရှာဖွေတွေ့ရှိပါက ဘတ်ငွေ ၃ သန်း ချီးမြှင့်မယ်လို့ လူပျောက်ကြေညာမှာ ထည့်သွင်းထားပါတယ်။
